Soltüstık Казахстан
Облыс орталығындағы “Алькор-СК” жауапкершілігі шектеулі серіктестігінің іргетасы 2013 жылы қаланған. Бүгінде ол азық-түлік тауарларын орайтын полиэтилен қапшықтар мен пленкалар шығаратын іргелі өндіріске айналған. Осы уақыт ішінде серіктестік “Даму” кәсіпкерлікті дамыту қорының қолдауымен өндірісін арттырған. Жас кәсіпкер Чингиз Ашамаев алғаш рет 2016 жылы қордың “Бизнестің жол картасы – 2020” бағдарламасының кепілдік беру тетігін пайдаланған екен. Содан бері ісі өрге басып, өндірісі кеңейе түсті. Қазір Чингиз Ашамаев – өзі ашқан серіктестіктің құрылтайшысы. Биыл тағы қордың көмегіне жүгініп, “2021-2025 жылдарға арналған кәсіпкерлікті дамыту жөніндегі ұлттық жоба” бағдарламасы бойынша айналымдағы қорын толтыру үшін екінші деңгейлі банктен 21,75 пайызбен 143 миллион теңге алған. Қалтасынан 7 пайызын ғана төлейді, қалғаны мемлекеттің көмегі есебінен өтеледі. Бұл – кәсіпкер үшін үлкен жеңілдік. Биыл кәсіпорын өндіріс ғимаратын, ондағы құрал-жабдықтарды жаңартқан. Нәтижесінде өндірістің бір айдағы қуаттылығы 25-тен 40 тоннаға ұлғайыпты.
– Алдағы уақытта өндіріс қуаттылығын 100 тоннаға дейін жеткіземіз. Қазіргі таңда серіктестікте 25 адам жұмыс істейді. Орташа еңбекақы – 180 мың теңге. Алдағы уақытта тың жобаны қолға алып, экологиялық таза пакеттер шығару өндірісін іске қосамыз, – дейді “Алькор-СК” жауапкершілігі шектеулі серіктестігінің директоры Константин Абибек.
“Даму” кәсіпкерлікті дамыту қоры” акционерлік қоғамы жұмысын негізгі екі бағыт бойынша үйлестіріп отыр. Олар – кәсіпкерлердің банктен алған кредиттерінің сыйақы мөлшерлемесін субсидиялау және кәсіпкерлер үшін банк алдында кепілдік жасау. Сондай-ақ оқыту және кеңес беру бойынша да қызметтері бар. Осындай міндеттерді атқарып жүрген қордың солтүстікқазақстандық филиалы талай кәсіпкерге қолдау көрсетті. Атап айтар болсақ, қор жұмысы жанданған 2010 жылдан бері 5578 жоба қолдау тапты. Оларға бағытталған қаржылай көмек сомасы 370 млрд. теңгені құрайды. Орта және шағын бизнестің арқасында 4122 адамға тұрақты жұмыс орны ашылған. Кәсіпкерлер бюджетке 112 млрд. теңге салық төлеген.
– Шағын және орта кәсіпкерлікпен айналысуға ниетті кез келген азаматқа қолдау көрсетеміз. Кәсіпкерлердің көбі екінші деңгейлі банктерден несие алғысы келгенімен, олардың талаптарын орындай алмай жатады. Сондай кезде біз көмекке келеміз. Банктің белгілеген сыйақы мөлшерлемесі бар. Қалалықтар оның 7 пайызын, ауыл тұрғындары 8 пайызын ғана қалтасынан төлейді. Қалғанын “Даму” қоры өз міндетіне алады. Үстіміздегі жылы 44 жобаға субсидия бөлінді. Жалпы биыл қор 8 млрд. теңге көлемінде субсидия беруді жоспарлап отыр, – дейді “Даму” кәсіпкерлікті дамыту қоры” АҚ облыстық филиалының директоры Гүлбаршын Дәулетбаева.
Гүлгүл ҚУАТҚЫЗЫ,
“Soltüstık Qazaqstan”.