ҚАЛДЫҚТЫ ҚАЙТА ӨҢДЕУ МАҢЫЗДЫ

Soltüstık Казахстан

 Kyzylzhar_akparat@mail.ru

Өңірімізге жұмыс сапарымен келген экология және табиғи ресурстар вице-министрі Нұркен Шәрбиев бірқатар маңызды өндірістік және инфрақұрылымдық нысандардың жұмысымен танысты.

Алдымен “Қызылжар-cу” ЖШС-ның кәріз суларын тазарту нысанында болды. Аталған кәсіпорын сарқынды сулар­ды күкіртсутек иісінен тазарту үшін хлорелла биомассасын қолданады. М.Қозыбаев атындағы Солтүстік Қа­зақстан университетінің ғалымдары ойластырған тазалаудың тың әдісі тиімділігін дәлелдепті. Қазір Шымкент және Қостанай қала­сында да кеңінен қолданылып жатыр.

Бұдан кейін вице-министр Петропавл қала­сындағы гидротехникалық құрылыс нысанының жұмысымен танысты. Қарғын суды өткізу режімі қалыпты жағдайда жұмыс істеп тұр. Өңірде жағдай тұрақты.

Вице-министр “Радуга” жауап­кершілігі шектеулі серіктестігінде қайталама шикізаттан қағаз өнімде­рін дайындаудың, сондай-ақ тұты­нушылар арасында үлкен сұра­нысқа ие пластиктен жасалған тауар өндірісінің барысымен танысты. Аталған кәсіпорында өндірілген пластик кәріз жабындысы салмағы 25 тоннаға дейінгі жүкті көтере алады.

Вице-министр өңірдегі басқа да бірнеше өндірістік нысандарды ара­лап, еңбек ұжымдарымен кездесіп, толғандырып жүрген сұрақтарына жауап берді.

Жұмыс сапарын өңірлік комму­никациялар қызметінің алаңында қорытындылаған ол аққайыңдар өл­кесінде назар аударарлық мәселелердің бар екенін атап өтті. Мәсе­лен, өңірдегі тұрмыстық қатты қалдықтар полигондарының дені та­лапқа сай келмейді. Ал қайта өңдеу және кәдеге жарату үлесі тек 18 пайызды құрайды. Дегенмен өңірде экологиялық ахуал тұрақты.

– Ғарыштық бақылау аясында өңірде заңсыз 163 қоқыс поли­гоны анықталып, 98 пайызы жойылды. Су шаруашылығы сала­сындағы 3 жобаны жүзеге асыруға 1,2 млрд. теңгеге бюджеттік өтінім берілді. Бұл қаржы Булаев, Есіл және Преснов топтық су құбырларының апаттық учаскелерін қалыпқа келтіруге бағытталмақ, – дейді Нұркен Шәрбиев.

Мемлекет басшысы 2 млрд. ағаш отырғызу бойынша тапсырма бергені мәлім. Былтыр өңірде 7 млн. көшет егілген. Биыл көшеттің санын 23 млн.-ға жеткізу жоспарланған.

Баспасөз мәслихаты барысын­да вице-министр балық шаруашылығы саласын да­мыту әлеуетіне тоқталды. 2021-2030 жылдарға арналған бағдарлама аясында былтыр облысымызда 986 тонна тауарлық балық өсіріліпті. Бұл жоспарланғаннан 286 тоннаға артық. Ал биыл жоспар бойынша 800 тонна балық өсірілмек.

Бектұрған ЛАҚАДЫЛ,

“Soltüstık Qazaqstan”.