Soltüstık Казахстан
Футболдан ел біріншілігінің 7-ші турында “Қызылжар” клубы өз алаңында ақтаулық “Каспийді” қабылдады. “Жастар” стадионында өткен ойында командалар тең есеппен тарқасты.
Бұл кездесуге дейін жерлестеріміз алты ойында да жеңіске жетсе, ақтаулықтар тек соңғы матчта ғана көкшетаулық “Оқжетпес” клубынан басым түскен болатын. Осылайша турнирлік кестеде солтүстікқазақстандықтар 18 ұпаймен бірінші орында тұрған.
Жерлестеріміз матчтың бірінші минуттарынан бастап шабуылға шықты. Нәтижесінде “Қызылжар” аяқдопшылары есеп ашты, алғашқы голды Тамаз Макацария салды. Кейін ақтаулықтар ойын тізгінін өз қолдарына алып, жерлестеріміздің қақпасын нысанаға алды. “Каспийдің” жылдам шабуылшылары көпке дейін айып алаңымыздан шықпады. Бірде қорғаушыларымыз қауіпті сейілтсе, енді бірде қақпашымыз қырағы әрекет етті. Есептегі басымдық 19-шы минутқа дейін ғана жалғасты. Төреші он бір метрлік айып добын белгілеп, Алексей Залеский мүлт кетпеді. Кездесудің алғашқы бөлімі 1:1 есебімен аяқталды.
Екінші таймда солтүстікқазақстандықтар жаңа деммен шабуылға шығып, жеңіске жету үшін барын салды. Бірақ қызылжарлықтар негізгі уақытта да, төреші қосқан қосымша бес минутта да қарсыластың тас қамал қорғанысын бұза алмады.
Ел біріншілігінің 7-ші турының қорытындысына сәйкес, “Қызылжар” клубы турнирлік кестедегі бірінші орнын сақтап қалды. Ал екінші сатыға елордалық “Астана” командасы жайғасты. “Каспий” болса, 4 ұпаймен 12-ші орынға көтерілді. Көш соңында “Мақтаарал” келе жатыр.
Аманжол НҰРТАЗИН,
“Soltüstık Qazaqstan”.