Soltüstık Казахстан
Аққайың ауданындағы Тереңкөлде балық қырылды. Алдын ала болжам бойынша, таяз көл қыста түбіне дейін қатып, су жәндіктері ауа жетпей тұншығып өлген.
Облыстық экология департаменті баспасөз қызметінің мәліметінше, көлде балықтың қырылу фактісі 25 сәуір күні тіркелген. Осыған орай экология департаменті, “Есіл облысаралық бассейндік балық шаруашылығы инспекциясы”, облыстық табиғи ресурстар және табиғат пайдалануды реттеу басқармасы, Аққайың ауданының ветеринарлық қызметі және “НПЦ РХ” жауапкершілігі шектеулі серіктестігінің мамандары оқиға орнына барды. Мән-жайды анықтау үшін өлген балық пен су сынамасы алынған.
“Есіл облысаралық бассейндік балық шаруашылығы инспекциясы” республикалық мемлекеттік мекемесінің мәліметінше, Тереңкөлде балықтың қырылып жатқандығы жөнінде хабар оларға “Whatsapp” арқылы түскен. Мамандардың айтуынша, көлде мөңке балығы қырылған. Өлген 100 килограмм балықты жинап, жою жұмыстары ұйымдастырылды.
Тереңкөл көлі Аққайың ауданындағы Аралағаш ауылына жақын орналасқан. Көлемі 286 гектар аумақты алып жатыр, тереңдігі бар болғаны 1,5 метр ғана.
Былтыр өңір көлдерінде 7 рет балықтың қырылу дерегі тіркелді. Олардың барлығында су жәндіктерінің ауа жетпей тұншығып өлгендігі анықталды.
Ақерке ДӘУРЕНБЕКҚЫЗЫ,
“Soltüstık Qazaqstan”.