Soltüstık Казахстан
Ғабит Мүсірепов атындағы облыстық балалар мен жасөспірімдер кітапханасында “Бір шаңырақ астында” атты фестиваль өтті. Шараға жас оқырмандар, №14 мектептің оқушылары мен өнер ұжымдары қатысты.
Жиналғандарға 1 мамыр – Қазақстан халқының бірлігі күні мерекесінің тарихы түсіндіріліп, этностар арасындағы достық тақырыбында сөз қозғалды. Шара барысында қонақтар назарына танымдық бағдарлама ұсынылып, өнерлі өрендер ән салып, өлең оқыды. Балалар халқымыздың тарихы мен салт-дәстүріне қатысты сұрақтарға жауап беріп, түрлі байқауларға қатысты, қазақтың ұлттық ойындарын ойнады. Сонымен қатар “Қуанамын” халықтық би студиясының шәкірттері би биледі. Фестиваль қорытындысы бойынша белсенді оқушыларға Алғыс хаттар мен сыйлықтар табысталды.
– Біз әр мереке сайын балалардың басын қосып, осындай танымдық іс-шараларды өткізуді әдетке айналдырғанбыз. Мұндай шараларға әсіресе өзге тілде білім алып жүрген жастарды шақыруға тырысамыз. Осылайша оларды халқымыздың тілі мен мәдениетін танып-білуге баулимыз, – дейді кітапхананың бөлім басшысы Динара Қаратаева.
Дина МҰРАТ,
“Soltüstık Qazaqstan”.