Soltüstık Казахстан
Облыстық тарихи-өлкетану музейіндегі құнды жәдігерлердің бірі – Әлти қажының самаурыны. Оның бүгінге дейін қалай сақталғанын білу үшін есімдері өңір жұртшылығына таныс өлкетанушылар, марқұм Социал Жұмабаев пен Қайролла Мұқановтың 2003 жылы шығарған “Бір әулеттің тарихы” кітабындағы “Сәдуақас пен Сейтахмет Көкеновтер” деректі мақаласын оқып шыққан жөн.
Өлкетанушылар Жамбыл ауданындағы Амангелді ауылының 86 жастағы қариясы Бәри Төлегенов (азан шақырып қойған аты Ғабдолбәри – С. Қ.) атамыздың аузынан жазып алған мәлімет бойынша, 1928 жылы Төңкеріс ауданы құрылып, орталығы Майбалық болған жылы Сәдуақас Әлтиұлының дүние-малы түгел тәркіленеді. Олардың біразы, қазіргі тілмен айтсақ, аукцион арқылы саудаланған. Сатылған бұйымдардың қатарында самаурын да бар. Қарағаш аулынан Ораз деген кісі Әлтидің жиырма литрлік самаурынын осы аукционда сатып алады. Аукционда Әлтидің, одан кейін Сәдуақастың шаруашылығында жұмыс істегендерге қымбат бұйымдар арзан бағада берілген екен.
Осы самаурын қазір Қызылжардағы облыстық тарихи-өлкетану музейінің экспозициялық залында тұр. Самаурын шүмегінің жоғары жағында медальдардың суреті бейнеленген. Бұл оның сапалы әрі көрмелерге қойылатынын көрсетеді. Музей қорына оны Ораздың немересі Әушәріп 1991 жылы тапсырған.
Самрат ҚҰСКЕНОВ,
облыстық тарихи-өлкетану музейінің қызметкері.