Soltüstık Казахстан
Сәбит Мұқанов атындағы облыстық қазақ сазды-драма театрының “Алуа” халық би ансамблі есеп беру концертін өткізді. Өрендер мың бұрала би билеп, өз өнерлерін жиналған қауымға паш етті.
– Би ансамблінің репертуарында заманауи, халықтық және балалар билері бар. Бұл ұжымның құрылғанына биыл 13 жыл толды. Бишілерді 4 жастан бастап даярлаймыз. Талантты жастар биден бөлек актерлік шеберлік және кескіндемемен де айналысады, – дейді ансамбль жетекшісі Жанна Хамитқызы.
“Алуа” халық би ансамблі осы уақытқа дейін түрлі байқауларға қатысып, көрерменнің көзайымына айналды. 2012 жылы Алматы қаласында өткен республикалық “Ақ көгершін”, 2013 жылы Астана қаласында ұйымдастырылған халықаралық байқаудың лауреаты. 2018 жылы елорда төрінде өткен “Бала шабыты” атты халықаралық байқауда бас жүлдені қанжығаларына байлады. Кеште ансамбльдің мың бұралған бишілері көрермендерді қазақ, татар, өзбек, неміс, тәжік ұлттарының және “Паутина”, “Хулиганить”, “Баттл”, тағы да басқа көптеген билерімен қуантты. Өнерпаздардың “Бауырсақ” және “Кошкин дом” атты ертегі қойылымдары жиналғандардың көңілінен шықты.
Рабиға ЕРАЛЫ,
“Soltüstık Qazaqstan”.