Soltüstık Казахстан
Өңірімізде балықшылардың кәсіби мерекесі аталып өтті. Қала маңындағы “Пестрое” көлінде жиналған кәсіп иелерін облыс әкімінің орынбасары Сәтжан Аблалиев төл мерекелерімен құттықтап, Құрмет грамотасы мен Алғыс хат табыстады.
Балық шаруашылығы – ел экономикасында өзіндік орны бар, тарихи мән-мағынасы жоғалмаған, адамзаттың ең көп шұғылданатын ата кәсіптерінің бірі. Дүниежүзілік балықшылар күні 1985 жылдан бері 27 шілдеде аталып өтсе, біздің елімізде ресми түрде 2017 жылы бекітіліп, шілде айының екінші жексенбісінде кәсіби мерекені тойлау дәстүрге айналған.
Қазіргі таңда облыста балық шаруашылығы қарқынды дамып келеді. Ауланатын балықтың 65 пайыздан астамы тұқы, ақ балық, шортан сынды жергілікті балық түрлері. Өңірде осындай бағалы балық түрлерін кәсіптік өсіруге болатын су қоймалары көп. Қазіргі таңда 3 мыңға жуық өзен-көл бар, олардың 500-ден астамы балық өсіруге қолайлы. Оның ішінде 300-ден аса су қоймасы пайдаланушыларға, 40-тан аса су қоймасы балық өсірумен айналысатын шаруашылықтарға берілген.
– Облыста балық шаруашылығын дамытудың 2030 жылға дейінгі бағдарламасы бекітілді. Бағдарлама аясында жылына 10 мың тоннаға дейін балық өсіру жоспарланып отыр. Облыстағы мемлекеттік және жеке шаруашылықтар белсенді түрде жұмыс істеп жатыр. Біз осы саланы қарқынды дамытуға көмегімізді аямаймыз. Себебі бұл саланы дамыту облысымыздың экономикасын көтеруге серпін береді, – деп атап өтті облыс әкімінің орынбасары.
Биыл өңірімізде айтулы мереке облыстық табиғи ресурстар және табиғат пайдалануды реттеу басқармасының ұйымдастыруымен алғаш рет салтанатты түрде тойланып отыр. Осыған орай өткізілген сайыста 26 балықшы бақ сынап, үздіктер марапатталды. Сондай-ақ волейбол, арқан тарту және шахматтан жарыс ұйымдастырылды. Ал балық көрмесінде “Петрофорель” балық шаруашылығы ғылыми-өндірістік орталығы” ЖШС, Экология және табиғи ресурстар министрлігі Балық шаруашылығы комитетінің “Петропавл балық питомнигі” РМК өздері өсіріп отырған балық түрлерін жиналған қауымға көрсетті.
Салтанатты шарада облыс әкімінің Құрмет грамотасымен Есіл облысаралық бассейндік балық шаруашылығы инспекциясының бөлім басшысы Ильдар Кәкімов, “Балық шаруашылығының ғылыми-өндірістік орталығы” ЖШС Солтүстік филиалының Петропавл қаласы тірек пунктінің меңгерушісі Виктор Фефелов марапатталды. “Есіл облысаралық бассейндік балық шаруашылығы инспекциясының” бас маманы Халық Жаровқа, жеке кәсіпкер Вячеслав Смирновқа облыс әкімінің Алғыс хаты табысталды. Сонымен қатар қажырлы еңбек етіп жүрген бірқатар мамандарға салалық министрліктің “Балық шаруашылығының еңбек сіңірген қызметкері” атағы беріліп, “Балық шаруашылығы саласында мінсіз қызметі үшін” төсбелгісімен марапатталды.
Ләзиза МЫРЗАНТАЙҚЫЗЫ,
“Soltüstık Qazaqstan”.