Өңір басшысы Айдарбек Сапаровтың Петропавлдағы №1 қалалық емханаға ескертусіз келуі тектен тек емес. Өйткені әлеуметтік желілерде адамдардың жергілікті медициналық қызметтің сапасына көңілдері толмай, жиі шағымданатынын жақсы білгендіктен, жағдайды нақты білуді ұйғарды. Ғимаратқа енуі сол екен, тіркеу бөліміндегі ұзын-сонар кезекті көрді. Емхана басшылығын қызмет орнынан таппады. Науқас жандар дәрігердің қабылдауына талон алу үшін таңғы сағат 6-дан кезекке тұратындарын, қыста далада бүрсеңдеп тоңатындарын, дәлізде орынның жетіспейтінін жарыса айтты. Әсіресе егде жастағыларға қиын.
“Damumed” қосымшасын пайдалану кезінде бірқатар проблемалар туындайды. Тіпті науқастардың бірі жолдамасы бола тұра, дәрігердің қабылдауына кіре алмаған.
Облыс әкімі невропатологтың қабылдауына неге талон жоқ екенін сұрады. Сөйтсе дәрігердің қабылдау уақыты тым шектеулі болып шықты. Бар-жоғы 10 талон ғана беріледі. Ал лор мен эндокринолог қабылдауына жазылуды сөз етудің өзі артық. Өйткені емханада маман жетіспейді. Атап айтқанда, 3 терапевт, осынша рентгенолог, эндокринолог, онколог, сәулелік диагностика және 4 жалпы тәжірибелік дәрігер тапшы.
– Емхананың басшысы жұмыс күнін облыстық денсаулық сақтау басқармасына барудан емес, нақ осы жерден бастауы тиіс. Дәрігерлер толыққанды жұмыс істейтін болса, мұндай ұзын-сонар кезек те туындамайды, адамдар әуре-сарсаңға да түспейді. Дәрігер екі сағаттық қабылдаудан кейін жеке клиникаға кетіп жатса, қандай сапалы ем туралы айтуға болады? Мұнда тіркелген халықтың көптігі ескеріліп, жұмысты үйлестірудің мүмкіндіктерін жете қарастыру қажет. Білікті де тәжірибелі мамандарды басқа емханалардан тарту керек, – деді А.Сапаров.
Айдарбек Сейпілұлы емхананың барлық қабаттарын аралап шықты. Дәліздердің жай-күйі талапқа сай емес. Нина Зырьянова ота жасатуға жолдама алып, фиброгастродуоденскопия тексерісіне келген. Портал арқылы тезірек кезекке тұруы керек. Алайда қарапайым медициналық ем алмақ түгіл, тиісті кабинетті таппай дал. Кабинеттердің қай жақта орналасқаны әр қабаттың кіре берісінде сызбамен ғана көрсетілген. Бірақ есігінде ешқандай белгі жоқ. Буфеттегі санитарлық тазалық та сын көтермейді. Науқас жандар мүмкіндігі шектеулі адамдарға арналған тар жол арқылы емханаға кіруге мәжбүр.
Өңір басшысы денсаулық сақтау басқармасының басшысы Құмар Қүсемісовке мәселелерді кешенді түрде жедел шешу, науқастардың шағымдарына уақтылы жауап беруді міндеттеді.
Осы кезде екі өкпесін қолына алып, ентіккен күйі №1 қалалық емхананың бас дәрігері Николай Новиков та келіп жетті. Ол “мекемеге қарасты бөлімшелерде болдым”, – деп ақталуға тырысты. Егде жастағы адамдар цифрлық технологияларды пайдаланбайтынын, ескі әдіс бойынша тіркеуге келетінін алға тартып, жауапкершіліктен сытылып кетуге тырысты. Мердігерлердің салғырттығынан былтырдан бері ғимаратқа күрделі жөндеу жүргізілмеген екен.
– Емханада бірінші басшы сіз болғандықтан, дәрігерлердің жұмыс істеуін ұйымдастыруға, қадағалауға міндеттісіз. Тәртіптің төмендігінен, бақылаудың жоқтығынан адамдар кімге барарын білмей сабылып жүр. Денсаулық сақтау басқармасының басшылығына емхана жұмысына тексеріс жүргізуге комиссия жіберуді тапсырамын. Нақты шаралар қабылдап, тәртіп орнатыңыз”, – дей келіп, емхананың бас дәрігеріне қатаң ескерту жариялады.
Айтылған сындардан қорытынды шығарып, жағдайды түзеу үшін 10 күн, кіре берістегі баспалдақтарды жөндеуге 3 күн уақыт берді.
Бет қатталып жатқанда: облыс әкімі Айдарбек Сапаров медициналық ұйымдар бас дәрігерлерінің қатысуымен денсаулық сақтау саласын дамытуға қатысты жедел кеңес өткізді. Жиын барысында тиісті басқарма басшыларының есептері тыңдалды.
Айдарбек Сейпілұлы өз сөзінде халыққа медициналық көмектің сапасы мен қолжетімділігін жақсартуға баса назар аударып, денсаулық сақтау басқармасы мен медициналық мекемелердің басшыларына 20 шілдеге дейін емханалардағы кезекті азайту, науқастарды қабылдау жағдайын жақсарту шараларын жүзеге асыруды жүктеді.
– Әлеуметтік желілерде тұрғындар емханалардың жұмысына жиі шағымданады. Бірінші емхананы аралау кезінде медициналық қызмет көрсету сапасына қатысты реніштер көп айтылды. Кадрлардың бір-бірін алмастыруы, басқа емханалардан салалық дәрігерлерді тарту мәселесін шеше отырып, адамдардың кезекті апталап, айлап күтпеуін қарастыру қажет. Мен алдағы уақытта да медициналық ұйымдарға ескертусіз бару тәжірибесін жалғастырамын, – деді өңір басшысы.
Өмір ЕСҚАЛИ,
“Soltustik Qazaqstan”.