Soltüstık Казахстан
Ел кезіп, жер көріп, саяхат жасағанды жаны сүйетін адамдардың бірі – менмін. Жаңа достар, сыры ашылмаған жұмбақ жерлер, естен кетпес қызықты оқиғаларды бастан кешуді жаным ерекше қалап тұрады.
Табаным тиген алғашқы күннен-ақ құт мекен бауырына басып, іскерлердің, қызу да қарбалас тіршіліктің, арман мен мақсаттың қаласы екендігін танытты. Еркелей сылдыр қаққан Есілдің толқындары жанға сая болып, өзіне баурай түсті.
Саяхатым айрықша қызықты болу үшін жоспар құрдым. Ойын-сауық құрып, сауда жасағанға қарағанда тарихымен терең танысып, ұлттық мәдени мұра жайлы көбірек білгім келді. Сондықтан ең бірінші бағыт Ұлттық мұражай болды. Егер сіз елорданы тамашалауға алғаш келген болсаңыз, бірден мұражайға жол тартыңыз. Тарихтың тереңіне үңіліп, уақытпен тілдесіп, құнды деректер мен жәдігерлерді көзбен көріп, рухани азық алып қайтасыз. Тарихи ғимараттар мен көшелерді, жағалауды аралап көрсеңіз, мәдени-танымдық туризмге таптырмас орын екенін ұғасыз.
Елорда қарқынды даму үстінде. Астана шағын қаладан заманауи мегаполиске айналды. Көптеген университеттер, мұражайлар мен театрлар ашылып, Қазақстанның ірі экономикалық және мәдени орталығы деген атауға әбден лайықты болды. Осылайша ерке Есілдің бойында іргетасы қаланған қала бүгінде елдің ордасына айналып отыр.
Жастар үшін махаббаттың, жасампаздықтың, достықтың, сұлулықтың, саяси ерік-жігердің символына айналған қалада сәулет өнерінің теңдессіз үлгілері бой көтерген. Жасампаз қаланың сырына қаныққаннан кейін тағы да жолға шықтым. Себебі жиһанкездікке құмар жаным тыныштық бермей, әлемнің басқа да кереметтеріне қарай жол тарттым…
Әйгерім ЕЛУБАЙҚЫЗЫ.