Soltüstık Казахстан
Қызылжар ауданындағы Берёзовка ауылының маңында орналасқан Ұлттық ұлан академиясының әскери атыс алаңында “Үздік жүргізуші” және “Үздік БТР экипажы” сайысының алғашқы кезеңі өткізілді.
Сайыста әскери қызметшілер АК-74 автоматынан, Макаров тапаншасынан, РПК мен ПКТ пулеметінен ату, сондай-ақ автомобильдер мен БТР-80 бронды дөңгелекті машиналарын жүргізу дағдыларын көрсетті. БТР экипаждары кедергілері бар жолдардан өтті.
Байқауға келісімшарт бойынша жұмыс істеп жатқан әскери қызметшілер, оқу орнының курсанттары мен сарбаздар қатысты. Облыстық төтенше жағдайлар жөніндегі департаменттің қызметкерлері де белсенділік танытты.
Талапкерлердің кәсіби шеберліктерін жан-жақты бағалау үшін техника және қару-жарақ бөлімінің офицерлерінен, техникалық қамтамасыз ету, қару-жарақ және атыс кафедраларынан комиссия құрылды, оны академия бастығының техника және қару-жарақ жөніндегі орынбасары, полковник Қайрат Токин басқарды.
Сайыстың қорытындысында ең жоғары – 90 балл жинаған автомобиль взводының аға маманы (аға жүргізушісі) ефрейтор Тасболат Досмағамбетов үздік жүргізуші деп танылды. Оқу-жауынгерлік және оқу машиналары взводының аға маманы (аға механигі) аға сержант Дархан Әлкенов басқарған БТР экипажы 92 ұпай жинады.
– Жарыстың басты мақсаты практикалық дағдыларды арттыру және академияның үздік жүргізушісі мен үздік экипажын анықтау болды. Біз конкурс қатысушыларына қойылатын талаптардың жан-жақты ойластырылғанын қадағаладық, – деді Қайрат Токин.
Байқау жеңімпаздары үстіміздегі жылдың қыркүйек айында Батыс Қазақстан облысында өтетін жалпы әскери байқауға қатысады.
Самрат ҚҰСКЕНОВ,
“Soltüstık Qazaqstan”.