Soltüstık Казахстан
Облыстық мәдениет, тілдерді дамыту және архив ісі басқармасының ұйымдастыруымен Петропавл қалалық Мәдениет үйінде Қазақстан халқы тілдері күніне арналған “Тіл – достық көпірі” облыстық фестивалінің ашылу салтанаты өтті. Фестивальге қалалық, аудандық мәдениет және тілдерді дамыту бөлімдерінің басшылары мен мамандары, этно-мәдени бірлестіктердің өкілдері, руханият жанашырлары қатысты.
Басқарманың бөлім басшысы Ернияз Сұлтан облыс басшылығы атынан фестивальдің ашылуымен құттықтады.
– Ұлттық сананы қалыптастыру жолында тілдің атқарар рөлі өте маңызды. Ынтымақ-бірліктің қадір-қасиетін түсініп, бағалай білген біздің жерлестеріміздің қазақ тілін үйренуге, қазақ қаламгерлерінің туындыларын оқуға деген құлшынысы жоғары. Өмір жолын осы бағытқа арнаған өзге этнос жастарының болашағынан зор үміт күтуге болады. Тағдырын қазақ тілімен байланыстырған жастар үшін қашан да жол ашық. Ұлы Абай, ақиық ақын Мағжан Жұмабаев сөйлеп кеткен ана тіліміздің қадір-қасиетін қазақ халқының рухани байлығынан іздеу керек, – деген ол алты адамға облыс әкімінің Құрмет грамотасын, бес маманға Алғыс хатын табыс етті.
Кейін Ғылым және жоғары білім министрлігі Тіл саясаты комитетінің лингвистикалық жұмыстар басқармасының басшысы Гүлфариза Мұқан фестивальдің ашылуымен құттықтап, Мағжан Жұмабаевтың туғанына 130 жыл толуына орай Шайсұлтан Шаяхметов атындағы “Тіл – Қазына” ұлттық ғылыми-практикалық орталығы ұйымдастырып жатқан “Мемлекеттік тіл – Тәуелсіздік символы” республикалық конкурсын өткізу мақсатымен таныстырды. Қазақстан халқы тілдері күні мерекесіне орай ана тіліміздің қолданыс аясының кеңеюіне қосқан үлесі үшін Гүлсәуле Қожакенова, Жазира Рамазанова, Закиржан Мамлютовты Тіл саясаты комитетінің Алғыс хатымен марапаттады.
“Түрік мәдениеті” қоғамдық бірлестігінің мүшесі Якуб Латипов, Ресей Федерациясы Омбы облыстық білімді дамыту институтының филология және коммуникация кафедрасының әдіскері, №100 жалпы орта мектебі орыс және қазақ тілі пәндерінің мұғалімі Бәткен Сәрсенова, Халықаралық “Қазақ тілі” қоғамы” қоғамдық бірлестігі облыстық филиалының өкілі, тіл жанашыры Азат Жолтай мінберге шығып, жүрекжарды лебіздерін жеткізді. Әнші Ерден Қожахметов орындаған “Елге тілек” әні кештің ажарын аша түсті.
Кеш “Мемлекеттік тіл – Тәуелсіздік символы” республикалық конкурсымен жалғасын тапты. Байқауға еліміздің барлық өңірі мен Астана, Алматы және Шымкент қалаларының мемлекеттік тілді жетік меңгерген 18-35 жас аралығындағы өзге этнос өкілдері қатысты.
Мемлекеттік тілдің қолданыс аясын кеңейту, қазақ тілінің этносаралық қарым-қатынас тілі ретіндегі рөлін күшейту, ұлттық құндылықтарды дәріптеу мақсатында өткізілген байқау 4 кезеңнен тұрды. “Жұлдызды сәт” кезеңінде талапкерлер өз өнерлерін көрсетсе, “Сөздің көркі” аталымында Отан, елге қызмет тақырыптарындағы мақал-мәтелдерді айтудан сайысты. “Ой ұшқыны” кезеңінде үміткер ұяшықты таңдап Отан, туған жер, салт-дәстүр, белгілі тұлғалар тақырыптарында ой толғады. Ал соңғы кезең “Ұшқыр сұрақ, ұтқыр жауап” деп аталды. Әр үміткер 15 сұраққа жылдам жауап беруі керек. Жүйріктердің бабы мен бағын Аслан Әлімбаев, Қасиет Молгаждаров, Жанар Таласпаева бастаған қазылар алқасы бағалады. Байқауға қатысушылардың бірі Абай облысының орталығы – Семей қаласынан келген Евгения Некрасова.
– Мен бұл байқауға Абай елінің атынан өнер көрсету үшін келіп отырмын. Ұлтым орыс болғанымен, жүрегім – қазақ. Медицина саласында мемлекеттік тілді насихаттауға үлес қосып келемін, – дейді ол.
Жеңімпаздар мен жүлдегерлерге арнайы дипломдар мен ақшалай сыйлықтар табысталып, соңында “Мен қазақша сөйлеймін” республикалық акциясының жеңімпаздары онлайн марапатталды.
Самрат ҚҰСКЕНОВ,
“Soltüstık Qazaqstan”.