Soltüstık Казахстан
Қытайдың Ханчжоу қаласында өтіп жатқан XIX Азия ойындарында солтүстікқазақстандық велошабандоз Алексей Луценко чемпион атанды. Жерлесімізді жарқын жеңісімен әлеуметтік желідегі жеке парақшасында облыс әкімі Ғауез Нұрмұхамбетов құттықтады.
“Алексей Луценко жекелей сында Азия ойындарының чемпионы атанып, еліміздің қоржынына бесінші алтынды салды. Біздің жерлесіміз осымен төртінші мәрте бұл сындардың жеңімпазы болып отыр. Алда топтық жарыс бар. Велошабандозымызға жеңіс тілеймін”, – деп жазды Ғауез Нұрмұхамбетов.
Алексей Луценко жекелей сында 39,6 шақырымдық қашықтықты 48:05:75 секунд ішінде бағындырды. Екінші орынға Қытай спортшысы Сюэ Мин жайғасса, үздік үштікті гонконгтік велошабандоз Винсент Ван Лау түйіндеді.
Алексей Луценко – бұған дейінгі Азия ойындарының үш дүркін жеңімпазы. Жерлесіміз 2014 жылы Оңтүстік Кореяның Инчхон қаласында өткен жарыста жекелей сында алтын алса, 2018 жылы Индонезияның Джакарта қаласында жекелей және топтық жарыста топ жарған болатын.
Ханчжоудағы Азия ойындары қазанның 7-сі күні аяқталады.
Аманжол НҰРТАЗИН,
“Soltüstık Qazaqstan”.