Soltüstık Казахстан
Қызылжар ауданындағы Прибрежное ауылдық округіне 3 елді мекен қарайды. Соның бірі – Шаховское ауылында ірілі-ұсақты бірнеше шаруашылық құрылған. Солардың біріне Диас Дайыров жетекшілік етеді. Бүгінде оның басқаруындағы “Крахмал Агро” жауапкершілігі шектеулі серіктестігі бірнеше бағытта жұмыс істейді. Ең негізгісі – ауыл шаруашылығы саласы. Биыл 7 мың гектар алқапқа, бидай, арпа, сұлы және майлы дақылдар өсіріп, күзгі егін орағын алдыңғылардың қатарында ұйымшылдықпен аяқтады. Озық технологияларды тиімді қолданудың арқасында орта есеппен алғанда гектар түсімділігі 17 гектарға жуықтады. Ауа райының бүгінгідей күрделі шағында бұл – өте жақсы көрсеткіш. Қамбаға түскен астықты тазалап, кептіріп, сапалы тұқымын әзірлеу үшін келесі жылдың қамына алаңсыз кірісіп кеткен.
Диас егіншіліктен бөлек, мал өсірумен де айналысады. Серіктестікте 1500 ірі қара мен 250 бас жылқы бағылады.
Жергілікті тұрғындар жас та болса бас бола білген оның ұйымдастырушылық, көпшіл, елдік қасиеттері атасына тартқанын сүйсіне айтады. Атасы марқұм Әлібай Дайыров – қаршадайынан еңбек етіп, үлкен абыройға бөленген ел ардақтысы. Тіркеушіліктен егіс бригадиріне дейінгі жолды өткеріп, кейін тракторшы және комбайншы курсын бітірген. “Сталинец-1” комбайнымен бір маусымда 6508 центнер астық бастырып, “Еңбек Қызыл Ту” орденімен марапатталған. Жанкешті еңбегі екі рет “Ленин”, “Құрмет белгісі” ордендерімен атап өтілген. 1976 жылы Социалистік Еңбек Ері атанған. Бүгінде Шаховское ауылында бір көшеге есімі берілген.
Диастың қолға алған бір шаруасы – екі жақты меморандум міндеттемеcіне сәйкес ауыл тұрғындары үшін демалыс орталығын тұрғызуы. Оны келесі жылы пайдалануға беруді ойластырып отыр.
Дәурен РАМАЗАНОВ,
Прибрежное ауылдық округінің әкімі.
Қызылжар ауданы.