Сапалы медицина – саулық кепілі

Өңірге жұмыс сапарымен Денсаулық сақтау вице-министрі Вячеслав Дудник келді. Іс-сапардың мақсаты – медицина саласында енгізіліп жатқан жаңашылдықтардан хабардар ету, жергілікті жерлердегі мәселелермен танысу. Ол азаматтарды қабылдап, бірқатар ме­дицина нысанда­ры­ның жұмысымен танысты. Сондай-ақ облыстың медициналық ұйымдарының директорларымен кеңес өткізді.

Вице-министр барған алғашқы ны­сан – облыстық көпбейінді ауру­ха­на. Биыл емдеу мекемесіне жа­ңа­дан 20 маман жұмысқа орнала­сып, кадр тапшылығы ше­шілген.

– Жас мамандарға қолдау көр­сетеміз. Мамандығына қарай 1,5-3 млн. теңге көтермеақы беріледі. Мәселен былтыр гинекологқа облыстық бюджеттен бөлек, өз қара­жатымыздан 1,5 млн. теңге бердік. Анестезиолог 3 млн. теңге алды. Нә­тижесінде былтыр 40,5 млн. теңгені осы мақсатқа жұмсадық. Дәрігерлер үйінен баспана беруге ты­рыса­мыз, бірақ бәріне бірдей жет­пейді. Сол себепті ай сайын қосымша 50 мың теңге төлейміз, – дейді көп­бе­йінді облыстық ауруха­наның бас директоры Сәкен Әмрин.

Қазіргі уақытта дәрігердің орташа еңбекақысы 868 мың теңге, медбикелер 374 мың теңге алады. Жыл сайын медициналық мекемеге қажетті қондырғылар алынып жатыр. Республикалық бюджеттен осы мақсатқа 1,1 млрд. теңге, облыстық қазынадан шамамен 300-400 млн. теңге бөлінеді.

Вячеслав Дудник облыстық перинаталдық орталықта да болды. 147 орынға арналған емдеу мекемесі жылына 5 мыңға жуық әйелді босандырады. Министрдің орынбасары солтүстікқазақстандық дәрігерлердің еңбегін жоғары бағалады. Іс-сапар барысында журналистерге арнап брифинг те өткізді.

“Атқарылып жатқан жұмыстың нәтижесінде биыл Солтүстік Қазақстан облысында өлім-жітім 9 пайызға төмендеді, сондай-ақ қан айналымы жүйесі ауруларынан болатын өлім 3 пайызға, қатерлі ісіктен болатын қайғылы жағдайлар 4 пайызға, тыныс алу органдары ауруларынан болатын өлім 15 пайызға, ал туберкулезден болатын өлім көрсеткіші 8 пайызға азайды. Нәресте өлімі 5 пайызға төмендеді.

Денсаулық сақтау жүйесіндегі негізгі бағыт – алғашқы медициналық көмек. Бұл – халыққа қажет барлық медициналық көмекті үйлестіруге арналған қызмет. Халықтың сұрауы бойынша амбулаториялық жағдайда мамандандырылған медициналық көмек көрсету қағидалары бекітілді. Енді жалпы практика дәрігерінің жолдамасынсыз консультациялық-диагностикалық қызметтер көрсетіледі”, – дейді Вячеслав Дудник. 

Сондай-ақ енді онкологиялық және гематологиялық ауруларға күдік болған жағдайда тексеру мен емдеуді жеделдету үшін “жасыл дәліз” енгізілді. Нәтижесінде онкологиялық ауруға күдік бар пациенттер 18 жұмыс күні ішінде барлық қажетті зертханалық зерттеулер, ультрадыбыстық зерттеу, рентген, ЭКГ, КТ, МРТ, сондай-ақ эндоскопия сияқты тексерулерден өте алады. 

Ауылдағы денсаулық сақтау саласы да ұмыт қалған жоқ.  Денсаулық сақтау ұйымдары желісінің жаңа мемлекеттік нормативі бекітілді. Енді халық саны 50 адамға дейінгі елді мекендерде үйде көмек көрсететін медициналық қызметкер болады.

“Ауылдық денсаулық сақтауды жаңғырту” ұлттық жобасы аясында медициналық мекеме – дәрігерлік амбулатория, фельдшерлік-акушерлік және медициналық пункт салынып, пайдалануға берілмек. Өңірлердің әкімдіктерімен бірге алғашқы медициналық-санитариялық көмектің 655 нысанын салу жоспарланған.

Қазіргі уақытта республикада ауылдарда 5397 медициналық ұйым, оның ішінде 2895 медициналық пункт, 790  фельдшерлік пункт,  1282  амбулатория, 227 емхана, 203 аурухана жұмыс істейді.

Солтүстік Қазақстан облысының ауылдық жерлерінде 46 медициналық мекеме – дәрігерлік амбулатория, фельдшерлік-акушерлік және медициналық пункт екі жылда салынып, пайдалануға берілмек”, – деді Вячеслав Дудник.

Тағы бір маңызды бағыттардың бірі – ана мен баланы қорғау.  2021 жылдан бастап елімізде “Аңсаған сәби” арнайы бағдарламасы іске қосылды. Осы бағдарлама аясында былтыр өңірге 190 квота бөлініп, 46 әйел жүкті болды. 

Министрдің орынбасары Вячеслав Дудниктің айтуынша, бүгінгі таңда денсаулық сақтау жүйесінде 78 мың дәрігер жұмыс істейді, оның ішінде біздің өңірде 1700 дәрігер және 5 мыңнан астам орта медицина қызметкері бар.

“Кадр жетіспеушілігі мәселесін шешу үшін биыл республикалық бюджет есебінен 6 мыңға жуық білім беру гранты бөлінді, оның 2,7 мыңы – бакалавриат және интернатура, 2,5 мыңы – резидентура, 325-і – магистратура, 160-ы – докторантура. Соның ішінде Солтүстік Қазақстан облысы үшін 92 маман білім алып жатыр. Биыл өңірдің қажеттілігіне сәйкес 23 түлек жіберілді, оның 3-і ауылдық жерлерге кетті. Осы жылы сертификаттау курстары арқылы арнайы мамандарды даярлау үшін жаңа білім беру бағдарламалары енгізілді”, – дейді министрдің орынбасары.

Мемлекет басшысының тапсырмасын орындау үшін 2020 жылдан бастап 2023 жылға дейін дәрігерлердің жалақысы жыл сайын 30 пайызға, орта медициналық персоналдың жалақысы 20 пайызға көбейді.

Міндетті әлеуметтік медициналық сақтандыру енгізілген сәттен бастап медициналық көмекті қаржыландыру көлемі 2,5 есе өсті. “Профилактикалық тексерулерді, медициналық консультациялық-диагностикалық қызметтерді және оңалтуды қаржыландыру көлемі 1,5 есе, стационарлық көмек 1,2 есе, жоғары технологиялық медициналық көмек  2,2 есе ұлғайтылды.

Сонымен қатар осы жылы онкология, босандыру және “Жедел жәрдем” тарифтері қайта қаралды.  Биыл 1 мамырдан бастап жұмыс істеу үшін ел аумағына уақытша келетін шетелдіктер үшін медициналық сақтандыру енгізілді.

Алдағы уақытта да Президенттің тапсырмаларын орындау және халыққа көрсетілетін медициналық көмектің сапасын арттыру жөнінде жан-жақты шаралар қабылданбақ.

Ақерке ДӘУРЕНБЕКҚЫЗЫ,

“Soltüstık Qazaqstan”.

Суретті түсірген

Самат БАЙҒАЗЫ.