Soltüstık Казахстан
Облыс әкімі Ғауез Нұрмұхамбетов Петропавл қаласындағы бірнеше кәсіпорынды аралап, жағдайымен танысты.
Құтқарушылар мен өрт сөндірушілерді арнайы жабдықтармен және қуатты техникамен жарақтандыру жақсарып, материалдық-техникалық база нығайып келеді. Соңғы 3 жылда өрттерді сөндіру, төтенше жағдайларды жою, апаттық-құтқару жұмыстарын жүргізуге жергілікті қазынадан 860 млн. теңге бөлінді. Өрт сөндіру бөлімдерінің қызметкерлеріне сегіз автокөліктің кілті табыс етілді. Сондай-ақ көлік және су техникасы, өрт-техникалық және құтқару жабдықтары сатып алынды, өрт сөндіру бөлімшелерінің ғимараттарына күрделі жөндеу жүргізуге жобалық-сметалық құжаттама әзірленді.
Өңір басшысы “Береке” шағынауданында салынып жатқан “өрт сөндіру депосы” кешенінің құрылыс аумағына барды. Облыстық төтенше жағдайлар департаментінің бастығы Ерік Сарыбаев облыс орталығының қауіпсіздігін қамтамасыз ету бағытында атқарылып жатқан шаралар туралы айтып берді.
Депоға 4 өрт сөндіру көлігіне арналған бокс, бөлімнің өрт сөндірушілерінің жұмысы мен демалысына қажетті үй-жайлар, қызметкерлерге арналған баспана кіреді. Жобаның құны 1 млрд. теңгеге жуық, келесі жылы күзге салым пайдалануға беріледі. Бұл бас шаhардың 27000-нан астам тұрғыны бар оңтүстік-шығыс бөлігін өртке қарсы сенімді қорғаумен қамтамасыз етуге мүмкіндік береді. Бұл аймақта алты орта мектеп, үш балабақша, 1700 тұрғын үй, бір ауысымда 250 адам қабылдайтын емхана, ондаған кәсіпорын мен жеті мұнай базасы орналасқан. Бұдан бөлек, жақын және алыс шетелдердің көліктерінің үлкен транзитін өткізетін республикалық және жергілікті маңызы бар автожол сияқты маңызды объектілер кіреді.
Ғауез Нұрмұхамбетов адамдарды түрлі қауіп-қатерлерден қорғау атқарушы органдар жұмысының басты бағыты болып табылатынын қадап айтты. Салынып жатқан кешенді қарап, құрылыс салушы компания, коммуникациялар мен жол инфрақұрылымына жауапты ұйымдар өкілдерімен әңгімелесті. Нысанды уақытында пайдалануға беру жайлы айтылды. Өрттер мен төтенше жағдайлардың алдын алу деңгейін арттыру, жауапкершілікті күшейту мәселелеріне назар аударылды. Кешен пайдалануға берілсе, тұрғындардың өмір сүру жайына оң әсер ететіні атап өтілді.
“Зенченко және К” командиттік серіктестігі сүт өнімдерін өндіруде көшбасшылар қатарында. Мұнда мал басының генетикалық көрсеткішін жақсарту, жемшөп қорын молайту ғылыми негізде жүргізіледі. Ғауез Торсанұлы серіктестіктің сүт зауытына соқты. Құрал-жабдықтардың негізгі бөлігі Германиядан әкелініп, өндіріс аумағы 3 мың шаршы метрге кеңейтілген. Сүт өндірудің жылдық қуаттылығы 1,5 есеге дейін артатын болады. Мемлекеттік қолдау өндіріске үлкен серпін беріп отыр.
“Казмяспродукт” жауапкершілігі шектеулі серіктестігі шығаратын шұжық өнімдері мен деликатестер де үлкен сұранысқа ие, республиканың өзге қалаларына да жөнелтіледі. Жеңілдікті бағдарламаларға қатысу арқылы цехтар жаңартылған, барлық жұмыс жүйесі автоматтандырылған, озық технологиялар арқылы атқарылады.
“Петропавл бройлер” құс фабрикасы іске қосылса, 80 адам тұрақты жұмыспен қамтамасыз етілмек. Оған құйылған инвестиция мөлшері – 2,5 млрд. теңге. Толық қуатына қосылған кезде жылына 10 мың тоннаға дейін құс еті өндірілмек.
Ғауез Торсанұлы жұмыс сапарының соңында “Әлем Астық Экспорт” ЖШС-да болды.
Дарья ПЫШМЫНЦЕВА.
Суретті түсірген
Самат БАЙҒАЗЫ.