Soltüstık Казахстан
Қазақстанның құрметті журналисі, Солтүстік Қазақстан облысының құрметті азаматы, марқұм Амандық Жантеміровтің есімі өңірімізге жақсы таныс. Қаламгердің “Жеті атаңды білесің бе?”, “Доктор от Бога”, “Қапсыт (Аткелтір)”, “Қызылжар өңірінің өшпес шежіресі”, “Атақоныс – Ақтомпақ”, “Сағындырған ауылым” кітаптары көзі ашық, көкірегі ояу оқырмандардың сүйікті туындысына айналған.
Жуырда журналистің көзі тірісінде туған жері – Қарақамыс ауылының тарихы туралы жазған мақалалары, Сәбит Мұқанов, Ғабит Мүсірепов, Қасым Қайсенов сынды қазақтың тұғыры биік тұлғалары жайлы естеліктері топтастырылған “Қарақамыс – Қапсыттар мекені” кітабы жарыққа шықты. Өкініштісі – көзі тірісінде туындыны әзірлеп қойған автор бұл еңбекті оқырмандарына өз қолымен табыстай алған жоқ. Оның бұл аманатын туған інісі Амантай Жантеміров орындады.
– Ағам бала күнінен бойына дарыған жазу өнеріне адал болды. Өз ісіне мұқият болғаны соншалық баспаға әзірлеп жүрген туындысының жоба-жоспарын, материалдардың рет-ретімен бәрін қағаз бетіне түсіріпті. Сол туындыны баспадан шығаруды міндетім деп білдім. Бұл ретте маған ағам ғұмырының басым бөлігін арнаған облыстық “Soltüstık Qazaqstan” газетінің ұжымы көп көмектесті, – дейді Амантай Мырзахметұлы.
Жинаққа қаламгердің бұрын баспа бетін көрген туындыларымен қатар Жарасбай Сүлейменов, Нұрсайын Шәріп, Өмір Есқали сынды ағаларамыздың Амандық Жантеміров туралы жазған мақалалары топтастырылған.
Самрат ҚҰСКЕНОВ,
“Soltüstık Qazaqstan”.