Soltüstık Казахстан
Нағыз ұстаз болу – бақыт әрі абырой. Білім беру саласында тәжірибелі де білімді, кәсіби білікті ұстаздар аз емес. Солардың бірі – Талғат Рамазанов. Ұзақ жылдар бойы ұстаздықтың ұлы жолында өзінің айшықты еңбегімен дараланған Талғат Сәкенұлы жайлы ерекше ілтипатпен айтуға болады. Ол ғибратты ғұмырының қымбат шақтарын өскелең ұрпақты оқыту мен тәрбиелеу ісіне арнап келеді. Өз ісіне берілген, шәкіртінің жанына нұр құя білген ұстаздың өмірі – жас мамандарға өнеге.
Ол – Аққайың ауданындағы Дайындық ауылының тумасы. Әкесі – Сәкен Рамазанұлы өмір бойы ұстаздық қызмет атқарса, анасы – Байни Шаймерденова 6 баланың тәрбиесін қадағалап, өсіріп, жеткізді. Аяулы анасы мен асқар таудай әкесі балаларының білім алып, үлкен азамат болуын армандады. Сәбилерінің ортаншысы – Талғат Сәкенұлының болашағына зор үмітпен қарады. Жастайынан білімге құштар Талғат Сәкенұлы ата-анасының сеніміне селкеу түсірген емес. Ұстаздық еңбек жолын 1995 жылы кіндік қаны тамған ауылындағы мектепте тарих пәнінің мұғалімі қызметінен бастайды. “Жас келсе – іске” дегендей, аз ғана уақытта жас маман аталмыш мектептің тәжірибелі ұстаздарынан мұғалімдіктің қыр-сырын үйреніп, білімі мен талабының арқасында әріптестерінің құрметіне бөленді. Осылайша мектеп табалдырығын имене аттаған жас маман аталған білім ордасында 31 жылға жуық ұстаздық қызмет атқарды. Оның байсалды мінезі, талапшылдығы, сабырлы қалпы, жүректі баурар адамгершілік қасиеттері оқушылардың көкірегіндегі шамшырақ отын жақты. Шәкірттерінің талайы өзі секілді қасиеттерге ие болды. Жас ұрпақты өмірден адаспай өз жолын табуға ынталандырған ұстаздың еңбегі зор.
Осы жылдар ішінде “Дайындық” ЖШС-ның директоры Біржан Шаймерденовпен тығыз жұмыс істей отыра, мектепке көп инвестиция тартты. Әлеуметтік серіктестікті нығайтудың арқасында мектеп тарихында болмаған спорт зал, шағын орталық, бастауыш сыныптарға арналған бөлек ғимарат салынды. Барлық оқушы тегін тамақпен қамтамасыз етілді. Осы жетістіктер екі басшының түсінісе жұмыс істеуінің арқасы деп білеміз.
Бір ұжымда 31 жыл еңбек еткен ол оқушылары мен мұғалімдерінің жетістіктерге жетуіне, мектепішілік, аудандық, облыстық, республикалық сайыстарда мектептің абыройы асқақтауы үшін барлық жағдайды жасап жүр. Мектеп оқушылары ұлттық спортпен шұғылданады. Республикалық сайыстардың жеңімпаздары аз емес. Өнерге де көп көңіл бөледі. Мектепте “Болашақ” домбырашылар тобы құрылып, олар көрермендерді қуантып келеді.
Білім беру саласында көп жылдар бойғы үздіксіз қызметі үшін “Қазақстан Республикасы білім және ғылым саласының үздік қызметкері” төсбелгісімен, Білім министрлігінің Құрмет грамотасымен, облыстық білім басқармасының, Аққайың ауданы әкімінің Алғыс хатымен марапатталды.
Талғат Рамазанов қоғамдық жұмысқа да белсенді араласады. Екі рет аудандық мәслихаттың депутаты болып, жерлестерін толғандырған мәселені шешуге зор үлес қосты.
Содан бері біраз уақыт өтті. Зымырап бара жатқан уақытты қуып жету мүмкін емес. Әріптесіміз бойындағы сол бір жастық жігердің оты сөнбегенін сөзбен емес, нақты істер арқылы көрсетіп келеді. Ұстаздың қарапайымдылығы мен ұқыптылығы, еңбекке деген ерекше ынтызарлығы өзгелерден оны ерекшелендіреді. Оның қайсар мінезі, ақжарқындығы мен қызметіне деген адалдығы жас мамандар үшін үлгі боларлық. Талғат Рамазановтың қазақтың қара домбырасымен ән шырқайтын өнері де бар. Мектепішілік іс-шаралардың белді мүшесі. Жас мамандардың оң бағытқа жол сілтер ақылшысы, кез келген сәтте көмек қолын соза білетін қамқор ұстаз.
Жүрегі шәкірт деп соққан ұстаз – отбасында да қадірлі жар, асқар тау әке, ардақты ата. Зайыбы екеуі ұл мен қыз тәрбиелеп, өсірген. Ұлын ұяға, қызын қияға қондырған өнегелі отбасы бүгінде немере сүйіп, ұрпақ қызығына бөленіп отыр.
Самал НҰРМАХАНБЕТОВА,
Дайындық негізгі мектебінің мұғалімі.
Аққайың ауданы.