ЕЛ БІРЛІГІМЕН МЫҚТЫ (Президент Қасым-Жомарт Тоқаевпен болған сұхбатты оқығаннан кейінгі ойлар)

Жаңа жолға түскеніміз анық

“Қазақ газеттері” ЖШС-ның Бас директоры, белгілі қалам­гер, ға­лым Дихан Қамзабек­ұлының Мемлекетіміздің бас­шысы Қа­сым-Жомарт Кемел­ұлы Тоқаев­пен сұхбаты шынында да көлем­ді екен. Еліміздің бү­гіні мен болашағына қатысты көптеген мәселелер қамтылып­ты. Бүкіл саналы ғұмырымды бұ­қаралық ақпарат саласына ар­наған адам болғандықтан, сұ­рақтарды өзім қойып отырғандай күй кештім. Ол ол ма, іштей өзімше жауап бе­руге де тырыс­тым. Жалпы ма­ған Президент­тің әңгімесі ұна­ды. Сұрақтарды ұсақ-ірі демей, бүкпесіз әңгіме өрбіткен.

Өткен жылдың қорытынды­лары туралы Президент: “Біз әділ және бәсекелі экономика жүйесін құруға кірістік. Экономи­каны әртараптандыру және мо­нополиядан арылту, инфрақұ­ры­лымды жаңғырту, бизнесті қол­дау, инвестиция тарту жұ­мыстарымен мықтап айналыс­тық. Әлеуметтік салада қорда­ла­нып қалған мәселелер біртін­деп шешіле бастады. Еліміздің түкпір-түкпірінде білім ошақтары, оның ішінде, “жайлы мектеп­тер” бой көтеруде. Ауылдарда ден­саулық сақтау нысандары са­лы­нып жатыр. Әлеуметтік тұр­ғыдан осал топтағы азаматтар­ға кешенді түрде қол­дау көрсету үшін Әлеуметтік кодекс қабыл­данды. Зиянды еңбек жағ­дайын­да жұмыс істейтін азамат­тар үшін арнайы төлемақы енгі­зіл­ді. Табиғатты қорғауға жауап­ты ме­ке­мелердің қызметкер­ле­ріне олар­дың өмірі мен денсау­лы­ғына төне­тін қауіп-қатерге қа­тысты үстеме­ақы төленетін бол­ды. Медицина қыз­мет­керлері­нің, мектепте, колледж­де және ба­лабақшада жұмыс істейтін педагогтардың жалақысы өсті. Ұлт­тық қордан балаларға қаржы беру мәселесін реттейтін заң кү­шіне енді. Негізгі экономикалық көрсеткіштерді, оның ішінде инфляция деңгейін ескере оты­рып ең төменгі жалақыны анық­тайтын әдістеме қабылданды”, – деді.

Қанша көлемді болса да, бір сұхбатта жыл ішінде тындырыл­ған барлық істерді жіпке тізген­дей түгендеп шығу мүмкін емес. Қайда болмасын атқарылған жұ­мыстар ұшан-теңіз. Шынымды айтайын, біз ел тізгінінін Қасым-Жомарт Кемелұлы алғаннан бері мүлде басқа мемлекетте өмір сүріп жатырмыз. Рас, әзір­ше жаңа Қазақстанды, әділетті Қа­зақстанды құрып тастадық деп кеудемізді қаға алмаспыз. Бі­рақ бағытымыз – айқын, мақса­ты­мыз – биік, сол жолға түскені­міз анық. Президент айтып отыр­ғандай, “…осы мақсатқа жету үшін біз бір ел болып, білек сыбана жұмыс істеуіміз керек”.

Біз бәрінен айырылып қала жаздадық

Президент қасіретті қаңтар оқиғасына қатысты сұрақтарға да әдеттегідей тура жауап беріп, қаскөйлердің мемлекеттік төң­ке­ріс жасамақ болғанын ашық айтып отыр. Бұл ретте сұрақ та орынды, жауап та салмақты шық­қан деп ойлаймын. Өйткені, жасыратыны жоқ, әлі күнге дейін арамызда бейбіт шеру еді, билік неге қару қолданды дей­тін­дер бар. Оларға менің айта­рым, қайдағы бейбіт шеру?! Лаң­кестіктің, содырлықтың бұдан ас­қан қандай сорақы түрі, өзіміз ай­тып, жазып жүргендей, ата-баба­ларымыз үш ғасыр бойы қа­нын төгіп, жанын беріп жүріп жа­қындатқан басты құндылығы­мыз – Тәуелсіздігімізге қол көте­руден асқан қандай ауыр қыл­мыс болуы мүмкін?! Кешегі Алаш­тың арыстары осы жолда не көрмеді?! Олар өз өмірлерін осы Тәуелсіздік үшін, бүгінгі ұр­пақтың бақытты өмірі үшін құр­бан етпеп пе еді?! Олай болса, сол күндері көшеге шығып, өз ша­ңырағын өзі шайқалтып, ір­ге­сіне өз қолымен от қойған қан­құйлы қарақшыларды лаңкес, содыр демегенде кім деп атай­мыз?! “Іштен шыққан жау жа­ман” деп бабаларымыз бекерге айтпаған ғой, жауапкершіліктен жұрдай тобыр өз халқына өзі со­ғыс ашты, жазықсыз жандарға ажал құштырды. Сөйтіп, ұлттық қауіпсіздігіміз бен мемлекеттігі­міздің басына қара бұлт үйірілді. Тәуелсіздік былай тұрсын, ел­ден, жерден айырылып қала жаздадық. Біз қаңтардың қара­лы күндерінде нағыз соғысты көр­дік.

Егер Президентіміз қалып­тас­қан ахуалды дұрыс бағалап, тығырыққа тірелген елді, бейбіт халықты қорғаудың пәрменді ша­раларын қабылдап, жедел жү­зеге асырмағанда алдын ала жан-жақты ойластырылған, мұз­дай қаруланған содырлардың сойқаны неге әкеліп соқтыраты­нын болжаудың өзі қиын еді. Біле білсек, Мемлекет басшы­сы­ның табандылығының, ерік-жігерінің, батыл іс-қимылдары­­ның арқасында ғана аман қал­дық. Ақиқаты сол, ел басына күн туғанда, Қасым-Жомарт Кемел­ұлы бүкіл жауапкершілікті мо­йнына алып, батыл қимылдап, өзінің нағыз көшбасшы екенін дәлелдеді.

Бақ бағалағанның басына қонады

Рас, соңғы 30 жылда біз бә­ріміз ауызбен орақ орып, жұмақ­та өмір сүріп жатқандай әсерде болдық. Қазақстан байлығының жартысы санаулы адамдардың қо­лына өтіп кеткенін енді біліп жа­тырмыз. Президент халықтан еш­теңені жасырып отырған жоқ, әр сөзінде елдегі жағдайдың күр­делі екенін дәттеп, оның бәрін бірлігімізбен, ұйымшылдығы­мыз­бен, елдегі тыныштықты сақ­тай отырып қана ретке келтіре алатынымызды, жылдар бойы қордаланып қалған мәселе­лер­дің бір күнде, бір айда, тіпті бір жылда шешіле қалмайтынын айтуда.

Сұхбаттан түйген тағы бір ой – қазір біз үлкен өзгерістер кезе­ңінде өмір сүріп жатырмыз. Қо­ғам­ды демократияландыру ба­ғы­тында нақты қадамдар жаса­луда. Мақсатымыз – халық сөзі­не құлақ асатын мемлекет құру. Өркениет жолын таңдадық. Пре­зидент, Парламент, Үкімет әді­летті қоғам орнатуға, монопо­лия­ларды жоюға, саяси транс­формация жасауға, еліміздің экономикалық дамуын жедел­де­туге күш салуда. Осы істер­ден қоғамның әрбір мүшесі шет қалмауға тиіс. “Баянды бола­шаққа да бірге қадам басуы­мыз қажет. Біз өткенді аң­саумен өмір сүр­меуіміз керек. Кері­сінше, келе­­ше­гі­мізді кемел етуге ұмты­лып, ұлт­­тың ұлы­лығын нақты іс­пен дәлел­­деуге тиіспіз. Дүние­таны­мы­мызға жат мәдениет­терге көзсіз елік­теу­ден, жалған патриотизмнен, даң­ғойлық пен дарақылықтан сақтануы­мыз керек. Халқымыздың бойында­ғы кемшілік­терге көз жұма қа­рамай, одан арылуы­мыз қажет. Мұның бәрі күн са­йын құбы­л­ған тұрлаусыз заманда өмір сүріп жатқан Қазақстанның келешегі үшін айрықша маңызды”, – дейді Президент.

Қасым-Жомарт Кемелұлы­ның жалпыұлттық құн­ды­лық­тар, сапалы ұлт қалыптастыру жол­дары туралы айтқан ойларын да қос қолымды көтеріп, қолдай­мын. Расында да еңбек­қор­лық, білімпаздық, кәсібилік, бір­лік, ын­­ты­мақ, жанашырлық, іскер­лік, баста­ма­шылдық, адалдық, қарапайым­дылық және үнемшілдік қана бізді табысқа жетелейді.

Бәріміз де елдің болашағын ойлаймыз. Еліміз аман, жұрты­мыз тыныш болса екен дейміз. Ол үшін бізге ең бастысы бірлік керек!

Жарасбай СҮЛЕЙМЕНОВ,

Солтүстік Қазақстан облыстық қоғамдық кеңесінің төрағасы.