“ХАЛЫҚТАН ҚАШЫП ЖҮРЕТІН АДАМ ДЕПУТАТ БОЛА АЛМАЙДЫ”

“Uäde” – тұрғындарды депутаттардың атқарған жұмысымен таныстыруға арналған жаңа айдар. Халық қалаулылары сайлаушылар алдында да, өздеріне де есеп береді. Жаңа айдардың дәстүрлі төрт сұрағына алғашқылардың бірі болып облыстық мәслихаттың депутаты Сәуле Сұрағанова жауап берді.

НЕ ҮШІН ДЕПУТАТ БОЛДЫМ?

Мен “Азаматтарға арналған үкімет” корпорациясында 22 жыл қызмет еттім. Онда әлеу­меттік қамту жөніндегі бөлімнің басшысы лауазымын атқарып, көпбалалы отбасылармен, мүм­кін­дігі шектеулі жандармен, яғни әлеуметтік қолдауға мұқ­таж адамдармен жұмыс істедім. 2020 жылы “Аманат” партиясы праймериз өткізгенде маған соған қатысу туралы ұсыныс түс­ті. Іштей дайын екенімді сездім. Жетінші шақырылымдағы мәс­лихат сайлауы өткенде осы тә­жірибеме сеніп, халық алдына бардым, қолдауына ие болдым.

Өздеріңіз білетіндей, ол ша­қырылым бір жарым жыл жұмыс істегеннен кейін мерзімінен бұ­рын таратылды. Осы кезде жинаған азды-көпті тәжірибемнің арқасында сегізінші шақыры­лымға депутат болып сайлан­дым. Бұл жолғы сайлау жүйесі күрделірек болды. Сайлауалды үгіт-насихат кезінде бұрын­ғыдай Жамбыл ғана емес, Мам­лют ауданының да тұрғындарымен кездестім. Себебі №7 сайлау округі екі ауданды қам­тиды. Екі ауданды да аралап, кездесулер өткіздім. Әсіресе Мамлют ауданына басымдық бердім. Себебі Жамбыл ауда­нында туып-өсіп, сонда жұмыс істегендіктен, ол жақ маған жақ­сы таныс. Ал Мамлют ауданы­ның тұрғындарымен көзбе-көз кездесіп, өзімді таныстыруға тура келді. Осы жерде атап өте­тін жайт – мемлекеттік корпорацияда тұрғындармен тікелей жұмыс істегенім көп көмектесті. Ол кезде баспанамен қамту, жәрдемақылар, жеңілдіктер, ерекше қажеттілігі бар балаларға қатысты мәселелер бойын­ша жиі хабарласатын. Мән-жайды түсіндіріп, көмекте­сетінбіз. Оның үстіне, мен – бес баланың анасымын. Сондықтан тұрғындар, оның ішіне көпба­лалалы аналарға қатысты мәсе­­­лелер маған етене таныс.

Депутат болу – халықтың мүд­десі үшін жұмыс істеу. Ал ха­лық дегеніміз – өзің сайланған округтің тұрғындары. Депутат ашық болуы керек дегенді жиі айтамыз. Жұрттан жүзін жасы­рып, үнемі тасада жүретін адам депутат бола алмайды. Мен бір мандаттық округ бойынша сай­лауға түстім. Халық сенім ар­тып, дауыс берді. Сондықтан сайлаушыларымнан жасырын­бай, алдарына барып, ашық сөй­лесемін. Біз халықтың ортасына барып, не істеп жатқанымызды айтып, қандай шешілмеген мәселелер бар екенін білуіміз керек. Сайлаушыларды толғандырып жүрген түйткілдер көп. Соны атқарушы билікке жеткізу – бізге жүктелген міндет.

САЙЛАУШЫЛАРҒА ҚАНДАЙ УӘДЕ БЕРДІМ?

Сайлауалды бағдарламам­да аспандағы Ай мен Күнді алып беремін деп уәде еткен емеспін. Бұрын да, қазір де ауыл тұрғы­дарын жол, сапалы ауызсумен қамту мәселесі тол­ғандырады. Шалғайда жатқан елді мекен тұр­ғындарына қыз­мет алу үшін ау­дан орталығына келіп-кету өте қиын. Оның үсті­не жөні түзу жол, үздіксіз қаты­нап тұрған кө­лік болмаса, ауылдағы ағайын­ның қиындығы есе­ле­не түседі. Тұрғындарды са­па­лы ауызсумен қамту – күн тәр­тібінде тұрған өзекті мәселе. Ауылдағы ағайын қаладағыдай жайлы өмір сүруді қалайды. Қа­лауы орынды. Сондықтан тір­ші­лік көзін үйіне дейін кіргізуге көп көңіл бөлініп жатыр. Әрбір үйдің ішінде сылдырап су ағып тұрса деп армандаймын.

ҚАЙ УӘДЕМДІ ОРЫНДАДЫМ?

Жамбыл ауданындағы Желез­ное ауылындағы жолдың са­пасы сын көтермейді. Аталмыш жолмен жүргендердің барлығы бұл жайлы біледі. Оның үстіне аудандағы балалардың сауық­тыру лагері де сол маңда орна­ласқан. Жолды жөндеуге екі жылдық жоба қолға алынды. Күзге таман қажетті материалдар жеткізіле бастады. Биыл жөн­деу жұмыстарына кіріседі. Бұл мәселе Архангелка, Ук­раинское, Благовещенка ауыл­да­рына да тән. Сондықтан ау­дандық тұрғын үй-коммуналдық шаруашылығы бөліміне үнемі хабарласып, қай жобалар бо­йынша жобалық-сметалық құжаттар бар екенін біліп отырамын. Смета дайын болса тиісті басқармаларға хабарласып, білек сыбана жұ­мыс істеуге мүмкіндік ашылады.

Өткен жылы Новорыбинка мен Кладбинка ауылдарында су тарату желілері салынды. Осы­ның нәтижесінде әр үйге тіршілік көзі тартылды. Ауылды жерлерде ұялы байланыстың сапасы нашар. Мирный, Буде­ный ауылдары тұрғындарының өтініші бойынша оператор­лармен жұмыс істеп, көтерілген мә­селе шешімін тапты.

Мамлют ауданының тұрғындары газ тарту мәселесін жиі кө­тереді. Бұл мәселені облыстық мәслихат депутаттары шеше ал­майтынын жасырып қайтейін. Біз­дің өңірден Парламент Мәжі­лі­сіне сайланған Еркебұлан Мәм­бетов осы жайтты республика­лық деңгейде көтерді. Аталған ауданда көшелерді жөн­деуге қатысты өтініштер көп ай­тылды. Биыл Мамлюткада алты көше жөнделді. Тұрмыстық қатты қал­дықтар жайы да – жиі айт­ы­лып жүрген мәселенің бірі. Ат­қару­шы билікпен бірлесіп, шеш­пек болған едік, ауданда бұл қыз­метті көрсететін кәсіпкер табыл­мады. Түйіні тарқатылмай, басы ашық күйі тұр. Қаңғыбас иттерді ұстауға қатысты арыз-шағымдар көп. Қаржы бөлінді, орын бел­гіленді. Енді қажетті нысанның құрылысы басталады.

Бике ауылына ат басын бұрғандар жолдың машақатын тар­тып жүр. Бұл – Мамлют және Жамбыл аудандарын байла­ныстыратын жол. Жолдың жо­балық-сметалық құжаты дайын. Облыстың үш жылдық бюдже­тіне енгізілді. Биыл осы жобаны жүзеге асыру көзделіп отыр.

Қазіргі таңда жастар ауыл­дан кетіп жатқаны жасырын емес Себебі ауылдарда бос уа­қытты тиімді өткізетіндей орын жоқ. Қазіргі таңда облыс аудан­дарында дене шынықтыру-сауықтыру кешендері салынып жатыр. Жамбыл ауданында да “Ауыл – ел бесігі” жобасы ая­сында осындай кешеннің құры­лысы басталған еді. Алайда құрылысы ұзаққа созылып кетті. Қолға алынған тиісті шаралардың нәтижесінде құрылыс жұ­мыстары аяқталуға жақын. Мамлют ауданына да осындай кешен қажет. Үстіміздегі жылы жүзеге асыру жоспарланып отыр.

Өзім сайланған округтің қа­зіргі жағдайын сараласам, Мам­лют ауданының орталығына дене шынықтыру-сауықтыру ке­шені, Жамбыл ауданына өндіріс орындары керек. Соңғысында инвесторлар аз. Бұл мәселе­лерді атқарушы билікпен бірлесе шешпесек, жалғыз депу­таттардың қолынан келмейді. “Жалғыздың үні, жаяудың шаңы шықпас” дегендей, бірлесе жұмыс істеген кезде ғана нәтижеге қол жеткіземіз.

ХАЛЫҚ МАҒАН СЕНЕ МЕ?

Халықтың сеніміне ие болу қиын. Алдына барып: “Маған се­нім артыңыздар. Сенімдеріңізді ақтаймын”, – деген бір ауыз сөз­бен көңілдерін аулау мүмкін емес. Жұмыс істеген адам ғана сенімге ие болады. Ең бастысы, қорықпау керек. Тұрғындардан қашқақтамай, сабырлы сөйле­сіп, сөзін мұқият тыңдасаң, халық өзі жақындай түседі. Ықылас қойып тыңдағанның өзі адамға үміт береді, сенім ұя­латады. Оның үстіне біз тыңдап қана қоймай, оны шешуге атса­лысуға міндеттіміз. Осы ретте ай сайын ауылдық округтер бойынша кездесулер өткіземін. Тұрғындар кездесулерге келіп, мәселелерін, өтініш-тілектерін айтады. №7 сайлау округінің аумағына Жамбыл және Мамлют аудандары кіргендіктен, мен екеуін бірдей қамтуым керек. Бұл ретте жүйелі жұмыс істеп, сайлаушылармен үнемі байла­ныста болу үшін аудандық мәс­лихатқа “AMANAT” партиясы атынан сайланған депутаттар­дың көмегіне жүгінемін. Әрі олар жергілікті жердегі жағдай­ды жақсы біледі. Тіпті мен шалғай ауылдарға бара алмайтын болсам, олар жолға шығып, мәселенің шешілуіне септігін тигізіп жатыр. Себебі бір партияның өкілі болғандықтан, бірлесе жұ­мыс істеуге тиіспіз. Алайда барлық мәселе түбегейлі шешілгенше өз бақылауымда болады. Ұялы телефоным үнемі қосулы, сайлаушыларым хабарласып, өздерін мазалаған мәселелерді айтып жатады. Халықтың үмітін ақтауға тырысамын. Әр мәсе­ле­нің арғы жағында адам тағдыры тұр. Сондықтан тұрғындардың өтініш-тілегін, көтерген мәселесін ұмытпай, әрдайым есте ұстаймын.

Дайындаған

Арайлым БЕЙСЕНБАЕВА,

“Soltüstık Qazaqstan”.