Soltüstık Казахстан
Петропавл қаласында түнгі уақытта тыныштықты бұзудың 2104 фактісі тіркелді. “102” телефонына келіп түсетін шақыртулардың басым бөлігі пәтерлерді жалға алатын адамдардың кінәсінен туындайды.
Демалыс күндері қоңыраулар саны артады, полицейлер кейде бір түнде 10-12 факті бойынша шара қабылдайды.
Петропавлдағы ең шулы пәтерлердің екеуі Интернационал көшесінде болса, біреуі Мағжан Жұмабаев көшесінде орналасқан. Бір жыл ішінде көршілері полицияға 7-8 рет шағым түсіріпті. Баспаналарды жалдап тұрған мазасыз тұрғындар әкімшілік жауапкершілікке тартылып, пәтерден шығарылған.
– Учаскелік полиция инспекторлары пәтерлердің иелерімен тиісті жұмыстар жүргізді, оларға әкімшілік құқық бұзушылықтардың жасалуына себеп болатын жағдайлар мен шарттарды жою туралы ұсыныстар жіберілді. Облыс орталығында осындай ұсыныстарды елемеген пәтер бюроларының бірінің жуырда әкімшісі жауапкершілікке тартылды. Жұмыс күндері сағат 22:00-ден таңғы сағат 9:00-ге дейін, демалыс және мереке күндері сағат 23:00-ден таңғы сағат 10:00-ге дейін тыныштықты бұзғаны үшін жеке тұлғаларға бес айлық есептік көрсеткіш көлемінде айыппұл қарастырылған, – дейді Петропавл қалалық полиция басқармасы жергілікті полиция қызметі бөлімінің бастығы Айдын Ақмағамбетов.
Әсет ҚАНАФИН.