Soltüstık Казахстан
Еліміздегі ірі кәсіпорындардың бірі саналатын “Петропавл ауыр машина жасау” зауыты мұнай және газ саласы жабдықтарын шығаруға маманданған. Өнім сапасы EN ISO 9001-2008 халықаралық стандарттар талабына толық жауап береді.
Соңғы жылдары мұнда аспанасты елінің кәсіпкерлерімен бірлесіп, жаңа жобалар жүзеге асырылып келеді. Соның бірі – ұшқышсыз ұшу аппараттарын өндіру бойынша қостараптық ынтымақтастық меморандумына қол қойылып, жаңа буын дрондардың құрастырылуы. Ұшқышсыз аппараттардың техникалық мүмкіндіктері өте мол, оларды әртүрлі салаларда пайдалануға болады. Ең бастысы, жоғары дәлдікке ие. Жаңа технологиялық ізденістер одан әрі жетілдіріліп, жекелеген бөлшектерді жергілікті өндіріс орнында жасау жоспарланған.
Сонымен қатар дрондарды басқару орталығы бар командалық пункт та толығымен осында жасақталады, яғни, ол жақта білімдерін толықтырып келген мамандар мен инженерлер топтасқан конструкторлар бюросы жұмыс істейтін болады. Осылайша ұшқышсыз ұшу аппараттарының алғашқы үлгілері бірлесіп шығарылса, келешекте дербес құрастыру белгіленген.
Мемлекет басшысы Қасым-Жомарт Тоқаевтың 2023 жылы Қытай Халық Республикасына жұмыс сапары қазақ-қытай қарым-қатынасын жаңа деңгейге көтерудің зор әлеуетін ашып берді. Президент: “Мемлекеттеріміз арасындағы сауда-саттық табысты дамып келеді. Айтарлықтай өсім бар. Инвестицияның көлемі 21 млрд. доллар болатын 52 бірлескен жоба жүзеге асырылып жатыр”, – дей келіп, мұнай-газ, мұнай-химия, энергетика, көлік-транзит салалары бойынша да берік стратегиялық серіктестік қалыптасатынына сенім білдірген болатын.
Петропавл ауыр машина жасау зауытының бас директоры Арман Құлмағамбетовтің жуырдағы Қытайға жұмыс сапары мұнай-газ өнімдерінің кең спектрін өндіруді бірлесіп дамытуға арналды. Серіктестермен өткен кездесулерде инвестициялық бағдарламаларды іске қосудың маңыздылығы, іскерлік байланыстарды тереңдетуге деген мүдделілік атап өтілді.
Сондай-ақ зауыттың инженерлік-техникалық қызметкерлерін серіктестіктердің есебінен оқыту бойынша уағдаластыққа қол жеткізілді.
Өмір ЕСҚАЛИ,
“Soltüstık Qazaqstan”.