Soltüstık Казахстан
Астанадағы Назарбаев университетінің базасында “Заманауи мектепті басқару: трендтер және болашақ” тақырыбындағы директорлар форумы өтті. Астана қаласы, Ақмола, Павлодар, Қостанай және Солтүстік Қазақстан облыстарындағы білім беру ұйымдарының 1200-ден астам басшысы жиналды.
Салалық министрлік ұйымдастырған шарада білім беру саласындағы өзекті мәселелер талқыланды. TEDx форматындағы интерактивті сессияға қатысқан еліміздің бас ұстазы Ғани Бейсембаев отандық білім беру жүйесін дамытудың маңызды аспектілеріне тоқталып, кадрлық әлеуетті арттыруға ерекше көңіл бөлінетінін атап өтті.
“Мемлекет басшысының қолдауымен төрт жыл ішінде педагогтардың жалақысы 100 пайызға, яғни, екі есе өсті. Өткен жылдың қыркүйегінде мектепке дейінгі ұйымдардағы педагогтардың жалақысы 30 пайызға көбейді. Бұл бағыттағы жұмыстар, яғни, педагогтарды қолдау шаралары жалғасады. Осы жылдан бастап білім беру қызметкерлерін көтермелеу жүйесі, сондай-ақ білім беру ұйымдары басшылары мен олардың орынбасарларының жалақысы қайта қаралатын болады”, – деді Оқу-ағарту министрі Ғани Бейсембаев.
Форумда қатысушылар үшін диалог алаңы ашылды. Онда білім беру саласындағы бақылау және мониторинг іс-шараларының қорытындыларымен таныстырып, биылға арналған жоспарлар баяндалды.
Осындай тың ақпараттар айтылған форумға Қызылжар ауданындағы №2 Бескөл орта мектебінің директоры Ботагөз Батанова да қатысты. Оның айтуынша, мұндай республикалық форумдардың берері мол.
– Әлемдік кеңістіктегі мектептердің қатарына өту, білім саласын дамыту – мемлекет басшысы талап етіп отырған міндеттердің бірі. Бұл мақсатқа жету үшін жаңашылдық, өзгеріс қажет. Педагогтар да аянбай еңбек етуіміз керек. Бұл – тек бізден ғана емес, педагогтар мен ата-аналардан күтілетін жауапкершілік. Осы форумға қатысқаннан кейін мен өз алдыма бірнеше мақсат қойдым. Мектеп ұжымы өзгерістерге бейім болып, сапалы білім, жақсы тәрбие беру жолында аянбай қызмет етуі тиіс, – дейді Ботагөз Батанова.
Бұған дейін Алматы қаласы, Түркістан, Жетісу және Алматы облыстарының мектеп директорларымен кездесулер өткен болатын. Форум алдағы уақытта еліміздің басқа өңірлерінде де жалғасады.
Самрат ҚҰСКЕНОВ,
“Soltüstık Qazaqstan”.