Soltüstık Казахстан
Әр қазақстандықтың елге, Отанға деген сүйіспеншілігі ең алдымен мемлекеттік тілге деген құрметінен көрінеді. Өкініштісі сол, қанша уақыт өтсе де әлі күнге дейін қазақ тіліне салғырт қарайтындардың әрекетіне куә болып келеміз. Тіліміздің ертеңіне енжар қарайтындар қарапайым нәрсенің өзінде ағаттыққа жол беріп, қоғамның сынына ұшырап жатады. Өңірдегі мемлекеттік тілдің жай-күйін осындай қарапайым қателерге қарап-ақ бағамдай беруге болады.
Ақпараттар мен маңдайшалардағы қателер, әсіресе, облыс орталығындағы сауда үйлері мен қоғамдық көліктерде көп кездеседі. Берілген суретте сондай самсаған көп қатенің тек бірнешеуін ғана мысал етіп беріп отырмыз. Әйтпесе басқа нысандардағы көп қатеге көбіміздің көзіміз үйреніп кеткендей.
Қаланың Интернационал және Пушкин көшелерінің қиылысында “Жеті ырыс” мейрамханасы орналасқан. Бірінші қабатында шағын сауда нүктесі бар. Оның қабырғасындағы жаңылтпаш жарнамаға назар аударайық.
“Магазин женской молодежной одежды” деген сөз мемлекеттік тілде “Әйелдердің жас киімдері дүкені” деп жазылған. Бұл сөзді оқып тұрып киімдердің “жасы”, “кәрісі” болады екен ғой деп қаласың. Баяғыдан бері “балғын еттің” бәлесімен басы қатқан тіл жанашырларына енді “жас киімді” жөндеуге тура келіп тұр. “Жүре берсең, көре бересің” дегендей, тілбұзарлардың осындай оспадарлығын көре-көре сауатсыз саудагерлерге таң қалмайтын күйге жеттік.
Бөкетов көшесі қиылысатын Амангелді көшесінің де қатеден аманы жоқ. Ол жердегі көше аты жазылған тақтайшадағы қатені бұған дейін газет бетінде жазып, түзетуге қол жеткізгенбіз. Алайда қала басшылығындағы жауаптылардың жұмысы осы қиылыстан әрі аспапты. Исмайлов көшесіне жете бергендегі жазулар тасқа қашалғандай тағы сол қате күйінде тұр. Мүмкін аталған көшенің шеткерірек жатқанынан болар. Аталған көшедегі қиылыста көше атауы “Амангельды” деп жазылған. Жазылуынан жаңылып, атауын ұмытатындай қаламызда қазақша көшелердің саны да айтарлықтай көп емес қой. Сол аз ғана көшенің атауын жөндеп жаза алмағанымыз елге сын.
Мұның бәрі – нысан иелері мен көрнекі ақпаратқа жауапты мамандардың салғырт жұмысының салдары. Тілбұзарлардың ана тілімізге деген қарым-қатынасынан олардың ұлттың ертеңіне немқұрайлылығы мен ниетін аңдай беріңіз.
Қошан ҚАЛИ,
журналист.