Soltüstık Казахстан
Енді азаматтар өз балаларының болашағы үшін білім беру мақсатындағы жинақтау салымын аша алады. Мұндай мүмкіндікті “Отбасы банк” ұсынып отыр. “AQYL” деп аталатын депозиттің мақсаты – азаматтарымыздың өз білім алуына немесе балаларының оқуына қаражат жинауына мүмкіндік жасау. Оның көмегімен қазақстандық немесе шетелдік білім беру мекемесінде оқу ақысын төлеуге болады.
“AQYL” жинақтау салымын кемінде 3 жыл немесе 5 жыл мерзімге ашуға болады. Егер депозит кемінде үш жыл мерзімге ашылса, онда депозит бойынша мөлшерлеме жылдық 12 пайызға (жылдық тиімді сыйақы мөлшерлемесі – ЖТСМ 13,1 пайызға дейін) тең болады. Егер депозит кемінде 5 жыл мерзімге ашылса, онда депозит бойынша мөлшерлеме 9,5 пайызға (ЖТСМ 10,1 пайызға дейін) тең болады. Банктің есептелген сыйақысы ай сайын капиталдандырылып отырады. Депозит мерзімі аяқталғаннан кейін ол автоматты түрде жаңартылады. “Банк жұмысының алғашқы сағаттарынан-ақ 50-ден астам қазақстандық депозит ашып үлгерді. “AQYL” – ата-аналарға балаларының оқуына қаражат жинауға көмектесетін ерекше құрал. Шынымен де, бала дүниеге келісімен əр отбасы ұрпағының қандай білім алатынын, ұлын не қызын шетелдік жоғары оқу орнында немесе қазақстандық институтта оқытатынын ойлайды. Егер бала грантқа түссе, онда “AQYL” депозитіндегі қаржыны алып, оларды кез келген өзге мақсатқа, соның ішінде тұрғын үй сатып алуға жұмсауға болады”, – дейді “Отбасы банк” басқарма төрағасы Лəззат Ибрагимова.
Депозитке жыл сайын есептелетін сыйлықақы салымшылардың барлық санаты үшін 5 пайызды құрайды. Жетім балаларға, ата-анасының қамқорлығынсыз қалған балаларға, мүмкіндігі шектеулі балаларға, көпбалалы отбасылардан шыққан жəне жан басына шаққандағы табысы аз, яғни азық-түлік себетінен төмен отбасыларға ашылған депозиттерге мемлекеттік сыйлықақы 7 пайыз мөлшерінде есептеледі. Жыл сайын депозитке есептелетін сыйлықақының ең жоғары мөлшері 100 айлық есептік көрсеткіштен (2024 жылға – 369 200 теңге) аспауға тиіс.
Мемлекеттік сыйлықақыны есептеу үшін салым бір жылға толуға тиіс. Депозит ашылған кезде міндетті түрде салынатын бастапқы жарнаның мөлшері үш айлық есептік көрсеткішке немесе 11 076 теңгеге (2024 жылы) тең болуы керек. Депозиттің ай сайынғы аударымдар мөлшерін салымшы өз мүмкіндігіне қарай анықтайды. Айта кетейік, депозит мемлекет пен үшінші тұлғалардың өндіріп алуынан қорғалған, сондай-ақ ол Қазақстандық депозиттерге кепілдік беру қорында сақтандырылған. Грант алған кезде жинақтаушы депозитті жабуға жəне мемлекеттік сыйлықақыны қоса алғанда, жинақтаудың барлық сомасын алуға болады.
Сонымен қатар бұл депозитті Ұлттық қордан алынған жинақтармен де толықтыру мүмкіндігі бар. Бұл төлемдерді биыл 18 жасқа толған қазақстандықтар қолдана алады. Оны “Ұлттық қор – балаларға” жобасы аясында “enpf-otbasy.kz” платформасы арқылы жүзеге асыруға болады.
Әсет ҚАНАФИН.