Soltüstık Казахстан
Өңірде көктемгі су тасқыны кезеңінде жол жабынын сақтау мақсатында жүк көліктерінің жүруіне шектеу қойылды. “ҚазАвтоЖол” Ұлттық компаниясы” акционерлік қоғамы облыстық филиалы баспасөз қызметінің мәліметінше, шектеу бір оське 8 тоннадан артық салмақ түсетін жүк көліктеріне қатысты.
Көлік және коммуникация министрінің “Қазақстан Республикасы республикалық маңызға ие жалпы қолданыстағы автокөлік жолдарында көлік құралдарының жүруін ұйымдастыру туралы” бұйрығына сәйкес биыл V климаттық аймақта 1 наурыз бен 1 сәуір аралығында, ІV климаттық аймақта 23 наурыз бен 1 мамыр аралығында қозғалысқа уақытша шектеулер енгізіліп отыр. Атап айтқанда, М-51 “Челябі-Новосібір”, М-36, “РФ шекара (Екатеринбург бағыты)-Алматы”, Р-49 “Петропавл қаласын айналып өтетін жол”, А-1 “Астана-Петропавл”, А-12 “Петропавл-Соколовка-РФ шекарасы” (Ишим қаласы бағыты), А-13 “Көкшетау-Кішкенекөл-Бидайық-РФ шекарасы” (Омбы бағыты), Р–57 “Петерфельд-Архангельское-Новокаменка-Жезқазған-Петропавл” сынды бағыттарда жүк көліктерінің жүруі шектеледі.
Бұл жолдарда қазіргі уақытта “ҚАЖсервис” жауапкершілігі шектеулі серіктестігі уақытша жол белгілерін орнатып жатыр. Барлығы 147 белгі орнатылады.
Ақерке ДӘУРЕНБЕКҚЫЗЫ,
“Soltüstık Qazaqstan”.