Soltüstık Казахстан
Сафуан Шаймерденов атындағы қалалық классикалық гимназияда Наурыз мейрамына арналған “Ұлыс күні – ырыс күні” атты облыстық оқушылар айтысы өтті. Сөз сайысына қатысқан өрендер қазақтың төл мейрамы жайлы әсерлі шумақтар айтып, жиналғандарды бір серпілтіп тастады.
– Біз облыстық деңгейдегі оқушылар айтысын алғаш рет ұйымдастырып отырмыз. Бұл – мектебіміз үшін үлкен мәртебе. Білім ордасында жас ақындар үйірмесі жұмыс істейді. Өлеңге құштар, домбыра тартуға әуес балалардың көбейіп келе жатқаны қуантады, – деді гимназия директоры Күлтай Мұқанова.
Сөз додасына қатысқан талапкерлер айтысқа ерекше дайындықпен келгендерін отты ойлары, жарасымды әзілдері арқылы дәлелдей білді. Айтыс көрермендері Мамлют аудандық өнер мектебінің шәкірті Тоғжан Төлегеннің өнеріне риза болды.
Қазылар алқасының шешімімен үшінші орынды Абай атындағы мамандандырылған қазақ мектеп-гимназиясының оқушысы Мәдина Серік, Жамбыл ауданының намысын қорғаған Анеля Серікбай, Абай атындағы мамандандырылған қазақ мектеп-гимназиясының оқушысы Ернар Дүйсен, екінші орынды Сафуан Шаймерденов атындағы қалалық классикалық гимназияның оқушысы Елдана Біржан, Абай атындағы мамандандырылған қазақ мектеп-гимназиясының оқушысы Нұрғиса Қайыртай алса, бірінші орынға айтысты ұйымдастырған білім ордасының оқушысы Әзиз Ақжарқынұлы ие болды. Айтыстың бас жүлдесі мамлюттік Тоғжан Төлегенге табыс етілді. Сөз сайысына қатысқан оқушыларға ақшалай сыйлық пен Алғыс хаттар табысталды.
– Мен айтыс сахнасына алғаш рет шықтым. Қарсыласым – Жалғас Қаби екеуіміз ауылдың қызы мен қала баласының айтысын жасадық. Қарсыласым осал болған жоқ, – дейді Тоғжан Төлеген.
Самрат ҚҰСКЕНОВ,
“Soltüstık Qazaqstan”.