Soltüstık Казахстан
1-ші мамыр күні солтүстікқазақстандықтар Қазақстан халқы облыстық ассамблеясының бастамасын қолдап, бір үйдің баласындай жұмылып, тасқынның салдарын жою бойынша сенбілікке шықты.
Үндеуді түрлі сала өкілдері, мемлекеттік қызметшілер, депутаттар, жастар, кәсіпкерлер, спортшылар, этномәдени бірлестік өкілдері мен еріктілер қолдады. Жұртшылық су тасқынынан зардап шеккен Ойқала шағынауданындағы көшелер мен үйлердің аумағын тазартты.
– Биыл Қазақстан халқының бірлігі күні ерекше мазмұнда өтті. 5000-нан астам қала тұрғыны саяжолдарды, аулаларды және су тасқынынан зардап шеккен аумақтарды тазартуға шықты. Барша тұрғындарды мерекемен құттықтаймын, біздің күшіміз бірлікте! – деп жазды қала басшысы Серік Мұхамедиев әлеуметтік желідегі парақшасында.
Су тасқыны кезінде Қазақстан халқы облыстық ассамблеясы аса маңызды рөл атқаруда. Достық үйінің базасында штаб орналасқан, еріктілер орталығы мен гуманитарлық көмек қабылдау пункті де ұйымдастырылды.
Ләзиза МЫРЗАНТАЙҚЫЗЫ,
“Soltüstık Qazaqstan”.