Soltüstık Казахстан
Абай атындағы мамандандырылған қазақ мектеп-гимназиясы жанындағы өнер орталығы “Өнерлі бала өрге жүзеді” атты концерт ұйымдастырды. Әуелете ән шырқап, мың бұрала би билеген жас өрендер көрермендердің ыстық ықыласына бөленді.
Сахна шымылдығы “Мұрагер” халық аспаптар оркестрінің орындауындағы Нұрғиса Тілендиевтің “Ата толғауы” күйімен ашылды. Балдырғандардың нәзік саусақтарымен тартқан күйлері көрермендердің таңдайын қақтырмай қоймады. “Бақшадағы ән” күйі, “Балдырғандар”, “Көзімнің қарасы”, “Балқадиша” әндері орындалғанда көпшілік орындарынан тұрып, қошемет көрсетті. Бірінші сынып оқушылары “Балалар ойыны” биімен жұрт назарын өздеріне аудартты. Бұл концертте жас өнерпаздар ұлттық аспаптардың барлық түрімен өнер көрсетті. Сонымен қатар Ерік Асқаров атындағы ақындар мектебінің шәкірттері Мәдина Серік, Дүйсен Ернар, Қайыртай Нұрғиса өздерінің ақындық өнерлерін паш етті. “Заман-ай” театрының тәрбиеленушілері Абай Құнанбайұлының аудармаларынан мысалдар оқыды.
– Өнер орталығы 2 жылда бір рет оқушылар концертін ұйымдастыруды дәстүрге айналдырған. Осы жолы шараға қалалық, облыстық, республикалық, халықаралық байқауларда жүлделі орындар алып жүрген қабілетті балаларды қатыстыруды жөн санадық. Мектеп сахнасында шыңдалған бала болашақта өз жолын адаспай табады, – дейді орталық жетекшісі Дәмеш Кұрманкина.
Бүгінде орталықта 26 арнайы музыкалық білімі бар маман жұмыс істейді. Шәкірттер музыка бөлімінде, “Заман-ай” театрында, “Нұр шашу” би ансамблінде және “Айтыскерлер” сыныбында тәрбиеленуде.
Сержан НҰРТОЛҚЫНҰЛЫ,
“Soltüstık Qazaqstan”.