Soltüstık Казахстан
Петропавлда су тасқыны кезінде 34 бау-бақша қоғамдастығы су астында қалды. Енді учаскелерінде үйлері бар саяжай иелеріне біржолғы төлем берілмек. Зардап шеккендер 370 мың теңге төлем алады.
Петропавл тұрғыны Ирина Купинаның “Звездочка” бау-бақша қоғамдастығында саяжай учаскесі бар. Биыл ол суға кетті. Тасқын учаскеде тұрған екі қабатты үйдің екінші қабатына дейін көтерілген.
“2017 жылы су тасқыны болғанда үйімізге кірген судың биіктігі 1,5 метрге дейін жеткен еді. Теледидар, тоңазытқышымыз, үйдегі жиһаздың барлығы жарамсыз болып қалды. Бұл жолы құтқарушылар үлкен судың келе жатқанын алдын ала ескертті. Бірақ дәл мұнша көтеріледі деп ойлаған жоқпыз. Заттарды екінші қабатқа шығардық. Бірақ су оларды да басып қалды”, – дейді ол.
Саяжай учаскесі әлі суда тұр. Иринаның айтуынша, осыдан жеті жыл бұрынғы су тасқыны кезінде жеміс ағаштары, көпжылдық гүлдер, жидектер – бәрі шіріп кеткен.
“Сол жылғы тасқыннан кейін бау-бақша жұмысымен айналыспаймын деп шешіп едім. Бірақ үйде қол қусырып отыра алмадым. Былтырлары саяжайға жаңадан жеміс ағаштарын, шыршалар, гортензия гүлдерін әкеліп отырғызғанмын. Шығын шаш-етектен. Әкімдіктің аз да болса шығынымызды өтейтінін естіп, көңіліміз көтерілді”, – дейді Ирина Купина.
Облыстық төтенше жағдайлар департаменті баспасөз қызметінің мәліметінше, Петропавлда 6597 саяжай учаскесі су астында қалған, оның 700-ден астамы иесіз. Біржолғы көмекті саяжай учаскесінде үйі бар 3031 тұрғын алады.
Ақерке ДӘУРЕНБЕКҚЫЗЫ,
“Soltüstık Qazaqstan”.