Soltüstık Казахстан
Өңірге Германия мен Дания корольдігінен асыл тұқымды ірі қара жеткізілді. Сауын сиырлар жаңадан ашылған тауарлы-сүт фермаларына апарылған.
Асыл тұқымды ірі қараның алғашқы партиясы – 34 бас голштино-фриз сиыры Қызылжар ауданындағы “Молодое-агро” жауапкершілігі шектеулі серіктестігіне жеткізілді. Қазір ірі қара карантинде тұр. Шаруашылық Архангелка елді мекенінің маңында салынып жатқан тауарлы-сүт фермасының құрылысын аяқтап, жақында пайдалануға бермек. Жаңа ферма 200 басқа шақталған.
“Тауарлы-сүт фермаларының ауылдарда ашылуы елді мекендерге әлеуметтік-экономикалық серпін береді. Бұл жоба толық іске қосылса, 20 адам тұрақты жұмысқа алынбақ. Голштино-фриз тұқымы сүтті, тез жерсінеді. Инвестициялық жоба аясында тағы 150 сиыр сатып әкелінеді. Нәтижесінде жылына 1200 тонна сүт алынбақ”, – дейді Қызылжар ауданы әкімінің орынбасары Дәурен Шақанов.
Осындай асыл тұқымды мал бірер күн бұрын Дания корольдігінен Шал ақын ауданындағы “LTD Zha-Group” тауарлы-сүт фермасына жеткізілді. 136 бас мал шілдеге дейін карантинде болмақ. Өйткені нысан осы уақытта пайдалануға беріледі.
“Біздің өңіріміз – тауарлы-сүт фермаларын салудан ел бойынша көшбасшы. Соңғы 6 жылда 36 осындай ферма салынды. Биыл тағы 8-і пайдалануға беріледі. Бұл сүт өндіруді арттырып, тұрғындарды жаңа жұмыс орындарымен қамтамасыз етеді”, – дейді облыстық ауыл шаруашылығы және жер қатынастары басқармасының басшысы Мейрам Меңдібаев.
Ведомствоның мәліметінше, соңғы үш жылда өңірдің сүт өндіру кәсіпорындары жылдық қуатын 388,8 мың тоннадан 451,3 мың тоннаға, яғни шамамен 14 пайызға арттырды.
Ақерке ДӘУРЕНБЕКҚЫЗЫ,
“Soltüstık Qazaqstan”.