Soltüstık Казахстан
Есіл ауданындағы Соленое көлінде балықтың қырылуына жеке кәсіпкердің бейғамдығы себеп болған. Аэрация жұмысының уақытылы жүргізілмеуінен су жәндіктеріне оттегі жетпей, тұншығып өлген.
Жауапты мамандар Покровка елді мекенінің маңындағы Соленое көлінде балықтың қырылғандығын әлеуметтік желіге мониторинг жүргізу барысында сәуір айында білген. Істің анық-қанығына жету үшін оқиға орнына жұмыс тобы аттанды. Оның құрамына мемлекеттік органдар, инспекция, экология департаментінің, ветеринария қызметінің өкілдері және облыстық табиғи ресурстар және табиғат пайдалануды реттеу басқармасының, балық шаруашылығы ғылыми-өндірістік орталығының мамандары кірген. Көлден 1,5 центнер өлген тұқы балығы жинап алынды.
“Экология департаменті мен ветеринарлық қызмет балықтың қырылуына не себеп болғанын анықтау үшін көл суын, өлген балықтың сынамасын алды. Бүгінде оның қорытындысы белгілі. Балық қыста оттегінің жетіспеушілігінен қырылған. Бұл факті бойынша инспекция көлді пайдаланушыны жауапқа тарту үшін құжат жинап жатыр”, – дейді Есіл облысаралық бассейндік балық шаруашылығы инспекциясының бөлім басшысы Ильдар Какимов.
Облыстық табиғи ресурстар және табиғат пайдалануды реттеу басқармасы мәлім еткендей, Соленое көлін “Чекунов” жеке кәсіпкерлігі жалға алған. Су айдыны 58 гектар аумақты алып жатыр. Көлдің орташа тереңдігі 1-2 метрден аспайды.
Ақерке ДӘУРЕНБЕКҚЫЗЫ,
“Soltüstık Qazaqstan”.