Soltüstık Казахстан
Өңірде 8-11 сынып оқушыларына арналған республикалық “Мағжан оқулары” байқауының облыстық кезеңі өтті. Байқаудың мақсаты – жалынды ақын Мағжан Жұмабаев мұрасын жас ұрпаққа насихаттау және ұлттық құндылықтарды дәріптеу, жаңа буынның интеллектуалдық пайым-парасатын арттыру.
Байқау үш аталым – “Өлең – менің Шолпаным, Айым, Күнім” Мағжан шығармаларын жатқа оқу, “Жасынан оқу оқып, өнер қуған…” ғылыми жоба жұмысы, “Ақын да бір бала ғой айға ұмтылған” жас дарындардың ақынға арнап жазған өлеңдерін жатқа мәнерлеп оқу бойынша өтті. Байқауға облыс мектептерінен 36 оқушы қатысты.
Байқау нәтижесі бойынша Мағжанның маржан жырларын мәнерлеп, нақышына келтіре жатқа айтып, бай шығармашылығын зерттеп, ғылыми жоба жазып, бақ сынаған үздіктер анықталды. “Өлең – менің Шолпаным, Айым, Күнім” аталымы бойынша Тайынша ауданындағы Мәдениет негізгі мектебінің оқушысы Райян Қоянбек жеңімпаз атанды. “Жасынан оқу оқып, өнер қуған …” ғылыми жоба жұмысы аталымында Қызылжар ауданы “Парасат” мектеп-лицейінің оқушысы Санжар Қонысбаевтың еңбегі үздік деп танылды. “Ақын да бір бала ғой айға ұмтылған” аталымында Ақжар ауданы Киев орта мектебінің оқушысы Бақыт Ысқақова бірінші орынды жеңіп алды.
Ләзиза МЫРЗАНТАЙҚЫЗЫ,
“Soltüstık Qazaqstan”.