Soltüstık Казахстан
Өңірімізге сыйлы, ұжымда беделді Ғабит Мүсірепов атындағы ауданның құрметті азаматы, еңбек ардагері, “Жарық-2005” ЖШС-ның директоры Нұғманов Мұрат Қабдоллаұлы 1 маусымда 70 жасқа толады.
Мұрат Қабдоллаұлы 1954 жылы 1 маусымда бұрынғы Көкшетау облысы Қызылту ауданы Қызылту ауылында дүниеге келген. 1972 жылы Рузаев орта мектебін бітіргеннен кейін еңбек жолын “Уәлиханов” кеңшарында слесарь-моторшы болып бастайды. 1978 жылы Целиноград ауыл шаруашылығы институтын тамамдап, “агроном-ғалым” мамандығын алып шығады. Жас маман туған ауылына келіп, өсімдіктерді қорғау бойынша агроном қызметіне кіріседі. 1982 жылы Рузаев ауданы “Привольный” кеңшарына агроном болып жіберіледі. 1988 жылы үлкен сенім көрсетіліп, Рузаев аудандық партия комитетінің ұйымдастыру бөліміне нұсқау қызметіне алынады. 1989 жылы “Шарық” кеңшарына бас агроном болып жіберіліп, директордың орынбасары міндетін қоса атқарады. Осы шаруашылыққа саналы ғұмырының 35 жылын арнайды. Кеңшарды өндірістік кооперативке айналдыра отырып, бұрынғы қарыздан құтылып, банкроттықтан сақтап қалады. Тұрғындардың әлеуметтік жағдайын жақсартуға баса көңіл бөледі.
Бүгінде Мұрат Қабдоллаұлы басқаратын “Жарық-2005” ЖШС – тұрақты дамып келе жатқан мақтаулы кәсіпорындардың бірі. Машина-техника паркі, өндірістік, әлеуметтік-мәдени объектілер түгелдей жаңартылды. Ауылда орта мектеп, фельдшерлік-амбулаториялық пункт, наубайхана, Мәдениет үйі, кітапхана, асхана жұмыс істейді. Андреев орта мектебінің жылу жүйесін жөндеуге 11 миллион теңге бөлді. Серіктестіктің қаражатына жастар орталығы, хоккей корты, стадион тұрғызылды. Көшелерін асфальттауға жобалық-сметалық құжаттар әзірленді. Қыс мезгілінде жолдар қардан тазартылып отырады.
Мәдени, спорттық, тағы басқа іс-шараларға қаржылық демеушілік жасау дәстүрге айналған. Қарт адамдарға, көпбалалы отбасыларға, жалғызілікті зейнеткерлерге тұрақты негізде қолдау көрсетіледі, азық-түлік себеттері жүйелі түрде беріледі.
Мұрат Қабдоллаұлына іскерлік, зор ұйымдастырушылық, уақытпен санаспай еңбек ету, жауапкершілік, үлкенге – құрмет, кішіге – ізет көрсету қасиеттері тән. Зайыбы Майпруза Төлегенқызы екеуі – үш бала тәрбиелеп өсіріп, немере-жиендерінің қызығын көріп отырған мейірімді, ұлағатты ата-әже. Қыздары Гүлшат, Салтанат, ұлы Манат, күйеу балалары-келіні – жоғары білімді мамандар.
Білікті басшының, тәжірибелі маманның елге сіңірген көп жылғы еселі еңбегі “Қазақстан Республикасының Тәуелсіздігіне –10 жыл”, “Қазақстан мәслихаттарына – 20 жыл”, І дәрежелі “Еңбек даңқы”, ІІ дәрежелі “Еңбек Даңқы”, Қазақстан Республикасы Ауыл шаруашылығы ардагерлер кеңесінің “Құрметті ардагер” мерекелік медальдарымен, Ауыл шаруашылығы министрінің, облыс әкімінің Құрмет грамоталарымен, “Парыз-2014” республикалық конкурсының “Бизнестің әлеуметтік жауапкершілігі” аталымы бойынша дипломмен, “Ғабит Мүсірепов атындағы ауданның құрметті азаматы”, тағы басқа марапаттармен атап өтілген.
Ел-жұртқа, ауыл-аймаққа сыйлы, беделді, қадірлі мерейтой иесіне ұзақ өмір, мықты денсаулық, отбасы, әулет бақыты мен қуанышын тілейміз.
Шолпан Салықова,
журналист.