Soltüstık Казахстан
Қоғамды іштен жегідей жеп тынатын жемқорлық адамзатпен бірге жасасып келеді деуге болады. Оны еңсеру бағытында атқарылып жатқан іс-шараларға, қолданылып жатқан небір тегеурінді тойтарыстарға қарамастан тамырын тереңге жайып, өте-мөте қауіпті кеселге айналып отыр. Президент сыбайлас жемқорлықпен ымырасыз күресу мемлекеттік саясаттағы негізгі басымдылықтардың бірі екенін атап өткен болатын. Заң үстемдігін орнатып, нағыз құқықтық мемлекет құру жолында оның тамырына балта шабу баршахалықтық талап болып саналады. Осы себепті ұлттық қауіпсіздік пен қоғамдық тұрақтылыққа төнген қатер ретінде сыбайлас жемқорлыққа қарсы күрес жөніндегі кешенді бағдарламаны дәйекті түрде жүзеге асыру басты міндет болып қала береді.
“Сыбайлас жемқорлыққа қарсы күрес туралы” Заң қабылданғаннан бергі уақыт бедерінде бұл салада мол тәжірибе жинақталып, нақты іс-әрекеттер дәйектілікпен жүзеге асырылып келеді. Мемлекет пен қоғамның бірлігі және өзара сенімділігі ғана түпкілікті еңсеруге мүмкіндік береді. Өз елінің болашағына алаңдайтын, қоғам алдындағы жауапкершілігін сезінетін еліміздің әр азаматы бұл мәселенің қаншалықты өзекті екенін жақсы түсінеді. Осы орайда сыбайлас жемқорлыққа қарсы іс-қимыл субъектілерінің өз құзіреті шегінде оған қарсы төзбеушілік иммунитетін қалыптастырудың, білім беру, ақпараттық және ұйымдастырушылық сипаттағы шараларды жүйелі жүргізудің маңызы зор. Әрбір азаматтың бойында қоғамда сыбайлас жемқорлыққа орын жоқтығын ұялата білсек, осы дерттің одан әрі өршімеуінің басты себебі болар еді. Сыбайлас жемқорлықпен күрес жөніндегі құқық қорғау органдары осы бағытты басты нысана еткен. Сыбайлас жемқорлыққа қарсы күрес қызметі, полиция департаментінің өзіндік қауіпсіздік басқармасы, ұлттық қауіпсіздік департаменті, арнаулы прокурорлардың бірлесе қимылының арқасында биыл қоғамдық кеселді анықтау көрсеткіші 45,5 пайызға артты. Бүгінде қылмыстық қудалау органдарының өндірісінде осы санаттағы 45 іс тіркелген. Сот үкімімен сегіз адам әртүрлі қылмыстық жауапкершілікке тартылды. Былтыр қалалық тұрғын үй-коммуналдық шаруашылығы басшысының бұрынғы орынбасары мен “Коммунхоз” МКК-ның бірқатар мердігерлік ұйымдарының жетекшілеріне қатысты қылмыстық іс қаралды. Олар шаhар жолдарын жөндеуде өзара келісімшарт жасасу барысында небір қитұрқылыққа барған. Сметалық бағаны қымбаттату және орындалмаған жұмыс көлемін қабылдау нәтижесінде 26 млн. теңге мөлшерінде бюджет қаржысы жымқырылған. Петропавл қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің қызметкері “Rixos Hotel Borovoe” қонақ үйінде тегін тұрған, келісімшартта көзделмеген ақша, квадрацикл мен өздері айырбастаған көліктер құнының айырмасын алған. Күдіктінің кінәсі куәгерлер, сараптама, істің материалдары арқылы дәлелденді. Кінәлілер мемлекеттік қызметте өмір бойы жұмыс істеу құқығынан айырылып, әртүрлі мерзімдерге сотталды. Мемлекетке келген шығын толық өтелді. Сот үкімі 6 мамырда заңды күшіне енді.
Бұл бағыттағы жұмыстар алдағы уақытта да жүйелі жүргізілетін болады.
Аида БАБАСОВА,
облыс прокурорының аға көмекшісі.