Soltüstık Казахстан
Облыс әкімі Ғауез Нұрмұхамбетов №2 Петропавл жылу электр орталығында (ЖЭО) болып, жылыту маусымына дайындық мәселесіне арналған жиын өткізді. Басқосуда осы салаға жауапты мекеме басшыларының есебі тыңдалды.
Биыл электр желілерін қайта жаңарту және жабдықтарды ауыстыру үшін 2,8 млрд. теңге қарастырылған. Көктемгі су тасқыны кезінде жарты мыңға жуық электр бағаналары қирап, 54,1 шақырым электр желісі істен шыққан. Келтірілген шығын мөлшері 2,7 млрд. теңгеге жуық. Су тасқынының ерекшеліктері ескеріліп, 200-ге жуық беріктігі жоғары металл бағаналар орнатылды. “Солтүстік Қазақстан электр тарату компаниясы” АҚ бас директоры Александр Чекулаевтың баяндауынша, тұтынушыларды электр энергиясымен қамтамасыз етуге, электрмен жабдықтау схемаларын қалпына келтіруге, яғни инвестициялық бағдарламаларға 565 млн. теңге қарастырылған. Жөндеу жұмыстарын 15 қарашаға дейін аяқтау белгіленген.
Жиында өңірдегі жылу желілерінің 77,5 пайызының тозығы жеткені айтылды. Оның ішінде магистральдық желілер – 82,7, тарату желілері 68 пайызды құрайды.
“Электриктер Қ.Сәтпаев көшесі бойындағы №3 жылу магистралінің 300 метрін қайта жаңартпақ. Оның 1,2 шақырымдық учаскесінде жөндеу жұмыстары аяқталды. Ружейников көшесіндегі №6 жылу магистралін қалпына келтіру биыл басталып, 400 метрі, 2026 жылы 1,3 шақырымы ауыстырылмақ. Жыл аяғына дейін №1 сорғы ғимараты жөнделіп, жаңа сорғылар орнатылады.
“Севказэнерго” АҚ бас директоры Анатолий Казановский 20 маусым-5 шілде аралығында №2 түтін құбырын тексеру жұмыстары жоспарланғанын, оның қорытындысына сәйкес кемшіліктер анықталса, шұғыл түрде шаралар қолданылатынын жеткізді. Бір қазандық пен екі турбоагрегат жөнделуде. Бұдан бөлек, бір қазандық пен турбоагрегат қайта жаңғыртылады. 401 шақырым электр желісі және 18 қосалқы станция жөнделеді. Алдағы жылыту маусымында облыс орталығын 2 мұржа жылумен қамтамасыз ететін болады. Инфрақұрылымды дамытуға, оның ішінде ауылдардағы тозығы жеткен электр желілерін жаңалауға несиелік қаражат тартылмақ. Аталған жылу компанияларында бос жұмыс орындары екі жүзден асады.
Кеңесті қорытындылаған өңір басшысы жауапты мемлекеттік органдарға құрылыс-жөндеу жұмыстарының сапасын, алдағы жылыту маусымының үзіліссіз жұмыс істеуін, мамандардың еңбекақысын көтеру жайын қатаң бақылауға алуды тапсырды.
Өмір ЕСҚАЛИ,
“Soltüstık Qazaqstan”.