Soltüstık Казахстан
“Тәні саудың – жаны сау”, – дейді халқымыз. Бірақ тән саулығы өзінен-өзі келмейді. Адам баласы саламатты өмір салтын ұстанып, спортпен айналысып, сергек қалпын сақтауы үшін мемлекет тарапынан қолдау, үгіт-насихат керек. Біздің ауданымызда бұл бағытта қыруар жұмыс атқарылып жатыр.
Тайынша ауданында 198 спорттық нысан бар. Оларда 93 ұжым жаттығады, оның ішінде 70-і ауылдық жерде орналасқан. 51 спорт түрі қамтылған, оның ішінде 16-сы олимпиадалық, 12-сі олимпиадалық емес, 9-ы ұлттық және 14-і мүгедектерге арналған спорт түрлері.
Соңғы жылдары салауатты өмір салтын ұстанатындардың қатары артты. Статистикалық мәліметтерге сүйенсек, ауданда дене шынықтырумен 17 мыңға жуық адам айналысады. Осы жылы халықты спортқа тарту мақсатында облыстық және аудандық деңгейдегі жарыстарды өткізуге қомақты қаражат бөлінді. 8 млн. 229 мың теңге жергілікті маңыздағы сайыстарға берілсе, өңірлік сындарды ұйымдастыруға 14 млн. 408 мың теңгеден астам қаржы қарастырылған. Тайыншада тұрғындарға арналған түрлі үйірмелер жұмыс істейді. Әсіресе ауыл азаматтары арасында волейбол, баскетбол, футбол, қазақ күресі, еркін және грек-рим күресі, футзал, ауыр атлетика, допты және шайбалы хоккейге қызығушылық жоғары.
“Солтүстік” пен “Ақ бидай” ойындарында командалық есепте тайыншалықтар үнемі жетістіктерге жетіп жүр. Мәселен, өткен жылы аудан тұрғындары халықтық спорт ойындарының бес спартакиадасына қатысты. Олардың қатарында “Солтүстік” өңірлік жарысы, “Үміт” мүмкіндігі шектеулі жандар сыны, “Қызылжар” ұлттық спорт түрлері, “Ақ бидай” жазғы спорт мерекесі мен “Жастар” спартакиадасы бар.
Ұрпақтан-ұрпаққа жалғасып, бүгінгі күнде өзінің өзектілігін жоғалтпаған ұлттық спорт ойындарына деген қызығушылық жоғары. Әсіресе көкпар, тоғызқұмалақ, асық ату сынды ойындар жастар арасында кең тараған. Бір ғана көкпар ойынын алсақ, бұл спорт түрінен аудан құрамасы жасақталған. Спортшыларымыз жыл сайын облыстық жарыста бақ сынайды. Әзірге командамыз биік белестерді бағындырған жоқ. Десе де алдағы уақытта өңірлік сайыстарда топ жаратынына сенімдімін.
Спортты дамытуға аудан басшылығы тарапынан көп көңіл бөлінеді. Өткен жылы Чкалово ауылында екі шағын футбол алаңы тұрғызылды. 2021 жылдың тамызында Тайынша қаласында заманауи жабық хоккей кортының құрылысы басталып, 2023 жылы аяқталды. Бұл әрине, қысы алты айға созылатын өңір үшін қажет нысан екені даусыз. Ғимаратты салуға 187,6 млн. теңге бөлінгенін атап өткен жөн.
Биыл спорт саласына 500 млн. теңгеден астам қаражат бөлінді. Бүгінгі таңда қомақты сомаға Большой изюм ауылында футбол алаңы тұрғызылып, Тайынша қаласындағы стадион күрделі жөндеуден өтуде. Мемлекеттік қолдау мен жеке кәсіпкерлердің көмегімен Келлеровкада дене шынықтыру-сауықтыру кешені тұрғызылуда. Нысан шілде айында халық игілігіне берілмекші.
Мемлекет тарапынан көрсетілетін қолдаудың арқасында Тайыншада бұқаралық спорт дамып келеді. Аудан орталығында ғана емес, шағын ауылдарда да спорт кешендері тұрғызылуда, бұл талантты атлеттерімізді жаңа жеңістерге бастайды деген ойдамын.
Ержан ЖҰМАБАЕВ,
Тайынша аудандық мәдениет, тілдерді дамыту, дене шынықтыру және спорт бөлімінің сектор меңгерушісі.