Soltüstık Казахстан
Облыс орталығындағы Назарбаев зияткерлік мектебінде “Білім берудегі зерттеулер: ақыл-ойды дамыту арқылы әлемді өзгерту” атты ғылыми-педагогикалық конференция өтті. Жиынға білім беру саласындағы жетекші педагогтар мен сарапшылар қатысып, оқытудағы тың әдістерді талқылады.
– Бүгінгі басты тақырып – STEAM әдістемесі. Ауыл, қала мектептері кабинетке тәуелді болмауы керек. Жалпы шектеу болмауы тиіс. Мұғалімдер білім беру үдерісін қиындатпай, қарапайым дүниелерді қолдана отырып, сабақты жеңіл түсіндіргені жөн, – деді Steam.kz компаниясының директоры Абзал Ақбарұлы.
Бұл жиынға Көкшетау қаласының Назарбаев зияткерлік мектебінің директоры мен педагогтары арнайы келді. Қатысушылар жиында педагогтардың кәсіби даму мәселесін талқылап, білім беру саласындағы соңғы өзгерістер мен зерттеулерді атап өтті.
– Шарада қызықты, мазмұнды жұмыс үлгілері көрсетілді. Оқушыларды тәрбиелеу, тұлғалық жағынан дамыту әдістерімен таныстық. Әрине, бұл әдістердің біреуін білсек, біреуін білмейміз. Болашақта оны өз жұмысымызда қолданамыз, – деді Ә.Досмұхамбетов атындағы облыстық дарынды балаларға мамандандырылған гимназия-интернатының педагог-психологы Гүлдана Қалиева.
Сондай-ақ жиналғандар постер-сессияға да қатысты. Мектеп мұғалімдері педагогикалық қызметтің жоғары стандарттарын көрсете отырып, өздерінің зерттеулері мен әзірлемелерін ұсынды.
Ләзиза МЫРЗАНТАЙҚЫЗЫ,
“Soltüstık Qazaqstan”.