Soltüstık Казахстан
Өңірде 1 сәуірден бастап 350 адамды кене шақты. Десек те, бұл өткен жылдың ұқсас кезеңімен салыстырғанда 1,3 есеге төмен.
Облыстық санитарлық-эпидемиологиялық бақылау департаменті басшысының орынбасары Арман Күшбасовтың айтуынша, былтыр сәуір-маусым аралығында 454 адамды кене шаққан. Биыл қансорғыштан зардап шеккендердің 29 пайызы, яғни 103-і – 14 жасқа дейінгі бала.
“Кене шағудың эпидемиялық маусымы қазан айына дейін жалғасады. Биыл кене энцефалиті және Лайм боррелиозы тіркелмеді. Жалпы кене – кене энцефалиті, кене сүзегі, кене боррелиозы немесе Лайм ауруы, геморрагиялық қызба және тағы басқа көптеген жұқпалы аурулардың қоздырғышы ретінде қауіпті”, – дейді Арман Күшбасов.
Кене энцефалитінің вирусы адамға негізінен иксод кенелер арқылы беріледі. Кенені езгенде немесе шаққан жерді тырнағанда вирус жұғуы мүмкін.
“Кене шаққан жағдайда оны күшпен жұлып алуға тырыспаңыз. Тұмсығы қалып қойып, қатты қабыну реакциясын тудыруы мүмкін. Кене шағып тұрған жерге этил спиртін немесе одеколон тамызып, кейін жәндіктің басы қалып қойматындай пинцетпен немесе қарапайым жіппен тартып алыңыз. Кенені пластик ыдысқа немесе бөтелкеге салып, екі күн ішінде оны зертханаға апару керек. Орнын йодпен немесе спиртпен өңдеңіз”, – дейді дәрігер.
Маманның айтуынша, кенені алу үшін майды, майлы кремді қолдануға болмайды. Бұл жағдайда ол демала алмай, сілекей мен қоздырғыштарды рефлекторлы түрде қанға жібереді, осылайша инфекция жұғу қаупін арттырады.
Ақерке ДӘУРЕНБЕКҚЫЗЫ,
“Soltüstık Qazaqstan”.