Soltüstık Казахстан
Биылғы жылдың үшінші тоқсанында 11 жастағы қыздарға адам папиллома вирусына қарсы вакцина қою басталады. Бұл Қазақстан Республикасының Ұлттық профилактикалық егу күнтізбесіне сай жүргізілмек. Облыста биыл 3638 қызға екпе қойылады деп жоспарлануда.
Адам папиллома вирусы – сүйелі бар адамдарда болатын вирустардың кең таралған тобы. Бұл вирустың жүзден астам түрі бар. Олардың көпшілігі қауіпсіз, тек 30-ға жуық түрі қатерлі ісіктің даму қаупін арттырады.
Статистикалық деректер бойынша, орташа есеппен жыл сайын Қазақстанда жатыр мойны обырының 1900-ге жуық жаңа жағдайы тіркеледі, жылына 600-ден астам әйел осы патологиядан қайтыс болады екен. Сол себепті биылдан бастап 11 және бұл жастан асқан қыздарға вакцина жүргізу жоспарланған. Екпеге дейін бұл вирустан туындаған аурулардың бар-жоғын тексеру міндетті емес.
Облыстық санитарлық-эпидемиологиялық бақылау департаменті аса қауіпті инфекциялар мен туберкулезді эпидемиологиялық қадағалау бөлімінің басшысы Юлия Гайсинаның айтуынша, иммундауды жүргізудің өз тәртібі бар. Қазақстан Республикасының Ұлттық профилактикалық егу күнтізбесіне сәйкес, 11 жастағы қыздарға екпе қою екі кезең бойынша жүргізіледі. Иммундаудың бірінші дозасы медициналық ұйым тағайындаған күні алынады, екінші дозасын – бірінші иммундауды алғаннан кейін 6 айдан кейін салады.
Мамандардың айтуынша, адам папиллома вирусынан туындаған қатерлі ісіктің алдын алудың жалғыз жолы бар. Ол – екпе егу. Екпенің тиімділігі 91-100 пайызды құрайды. Егер адам аталмыш вирусты тасымалдаушымен байланысқа түспеген болса, бұл вакцина 15 жасқа дейін пайдалы. Дегенмен, вакцина адам папиллома вирусының ағзаға енуінен қорғамайды. Бірақ 16 және 18-типті, яғни жатыр мойны, жұтқыншақ, сыртқы жыныс мүшелерінің және тағы басқа қатерлі ісіктің даму қаупін айтарлықтай төмендететін көрінеді.
– 11 жастағы қыздарға вакцина дәрігердің қарауынан кейін ата-аналарының немесе қамқоршыларының келісімімен қойылады. Егер ешқандай қарсы көрсетілімдер болмаса екпе жүргізу ұсынылады. Вакцина тегін білім беру ұйымдарының егу кабинеттерінде қолжетімді. Сондай-ақ ата-аналардың қалауы бойынша тіркелген жері бойынша емханалардан да алуға болады. Қазақстанда АҚШ-тың төрт валентті “Гардасил” вакцинасымен адам папиллома вирусына қарсы вакциналау жүргізу жоспарлануда. Бұл вакцина 6, 11, 16 және 18 типті адам папиллома вирусынан туындаған аурулардың алдын алуға арналған, – дейді бөлім басшысы.
Облыстық денсаулық сақтау басқармасының хабарлауынша, 2024-2027 жылдарға республикалық бюджеттен екі дозалық вакцинаны алуға 202459 мың теңге қаражат бөлу жоспарланған.
Ләзиза МЫРЗАНТАЙҚЫЗЫ,
“Soltüstık Qazaqstan”.