Soltüstık Казахстан
Бұған дейін көлік құралдарын қайта тіркеу үшін автокөлікті сатып алу-сатудың нотариалды куәландырылған шарты қажет болатын. Енді мамандандырылған ХҚКО қызметкері электрондық құжатты жүйеде қалыптастырады, ал сатушы мен сатып алушы “eGov mobile” қосымшасының көмегімен QR кодты сканерлеу арқылы құжатқа қол қояды.
Айта кету керек, қызмет “Азаматтарға арналған үкіметке” тиесілі. Бұл жаңашылдық қызмет алушылардың ыңғайлылығы мен жайлылығы үшін және көлік құралдарын тіркеу кезінде сыбайлас жемқорлықты жою мақсатында енгізілді. Енді мемлекеттік корпорацияның, Ішкі істер министрлігінің және “ҰАТ” АҚ ақпараттық жүйелерінің ықпалдасуының нәтижесінде автокөлікті қайта ресімдеу процесі ашық болады. Мәмілені тіркеу кезінде жалған қол қою мүмкін емес.
Қызмет алушылар жүгінген кезде мамандандырылған халыққа қызмет көрсету орталығының операторы сатушы мен сатып алушы туралы, сондай-ақ көлік құралы жайлы мәліметтерді жүйеге енгізеді. Осыдан кейін жүйе автоматты түрде мәміленің электрондық жазбаша нұсқасын қалыптастырады және экранға QR код шығарылады. Оны сканерлегеннен кейін, автокөлікті сатушы және сатып алушы тараптар құжатпен танысып, оған ЭЦҚ-ның көмегімен қол қоя алады.
Сондай-ақ ұйымның мүдделерін білдіруге сенімхаты және ЭЦҚ пайдалану құқығы бар заңды тұлғалардың өкілдері үшін де бұл процестің аналогы “eGov business” қосымшасы арқылы қолжетімді.
Осы тұста көлік құралдарын қайта рәсімдеу кезінде мәміленің қағаз түріндегі жазбаша түрін қабылдау үстіміздегі жылдың 23 сәуірінде Ішкі істер министрлігінің көлік құралдарын тіркеу және есепке алу қағидаларына өзгерістер мен толықтырулар енгізілгендіктен жойылғанын естеріңізге сала кетейік.
Анар ҚҰСАНОВА,
“Азаматтарға арналған үкімет” мемлекеттік корпорациясы” акционерлік қоғамының Солтүстік Қазақстан облысы бойынша PR менеджері.