Soltüstık Казахстан
“AMANAT” партиясы облыстық филиалы жанындағы отбасы және халықты әлеуметтік қорғау мәселелері жөніндегі өңірлік кеңестің отырысында инклюзивті қоғам құру мәселесі қаралды.
Өңірдегі аутизм орталығындағы кезек мәселесі өзекті тақырыптардың біріне айналған. 2023 жылдан бастап орталық екі ауысымда жұмыс істей бастағанына қарамастан, 253 бала әлі де мамандандырылған психологиялық-педагогикалық қолдауға мұқтаж. Жалпы өңірде 723 бала аутизммен ауырады.
Облыстық білім басқармасы басшысының орынбасары Динара Анафинаның айтуынша, жылдың соңында “Береке” шағынауданында салынып жатқан №2 арнайы мектеп-интернат қолданысқа берілгеннен кейін сол жерде аутизм орталығын ашу жоспарда бар.
– Мүгедектерге арналған көтергіш саты орнату туралы қорытынды алынды. Сондай-ақ 3-ші қабатта 570 шаршы метр аумақ анықталды. Балалармен 17 маман айналысатын болады. Олар бір лекте 50 баланы қамти алады. Орталыққа жыл сайын 43 млн. теңге бөлінбек. Оның ашылуымен біз кезек мәселесін түбегейлі шешеміз, – деді Динара Анафина.
Кеңес барысында мүгедек адамдарға арналған нысандарды бейімдеу, оларды жұмысқа орналастыру және халықтың әлеуметтік осал топтары санатындағы балалардың жазғы демалысын ұйымдастыру мәселелері де талқыланды. Облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Татьяна Береская 2027 жылға дейін ерекше қажеттіліктері бар азаматтар үшін 773 білім беру, денсаулық сақтау, мәдениет, спорт, мемлекеттік органдар және басқа да объектілерді бейімдеу жоспарланып отырғанын айтты. Мүмкіндігі шектеулі адамдарды қолдау мақсатында атқарылған жұмыстар да аз емес. Осы жылдың басынан бастап мүмкіндігі шектеулі 201 жан жұмысқа орналастырылып, 50 адам “Бастау бизнес” жобасы бойынша оқудан өтіп, өз істерін ашқан.
Мамандардың сөзінше, осы жазда халықтың әлеуметтік осал топтарынан 16644 бала сауықтыру мен демалыстың барлық түрлерімен қамтылған. Олардың қатарында жетім, ата-анасының қамқорлығынсыз қалған, аз қамтылған, көпбалалы отбасылардан шыққан және өмірлік қиын жағдайға тап болған балалар мен мүгедек жандар бар.
Гүлфайруз ТӨРЕМҰРАТОВА,
“Soltüstık Qazaqstan”.