Soltüstık Казахстан
Озық технологиялардың, оның ішінде интернеттің қарыштап дамып, күнделікті тұрмысымыз бен тіршілігімізге, қолданысымызға дендеп енгенімен, талай ғасырдан бері қойындасып, өміріміздің бөлінбес бір бөлшегіне айналған газет-журнал, теледидар, радио сияқты бұқаралық ақпарат құралдарының рөлі төмендемек емес.
АҚШ, Жапония, Германия сияқты экономикасы өркендеген өркениетті мемлекеттер таңдай қақтырып, көз жанарын тұндыратын нешеме әлем-жәлем әлеуметтік желілерге шырмауықша шырматылса да, мерзімді басылымдардан қол үзген жоқ. Бұлардың қайсыбірінде күніне жүздеген мың тиражбен тарайтын үнжарияларға оқырмандар қызығушылығы басым. Демек, ұлт көсемі Ахмет Байтұрсынның “газет – халықтың көзі, құлағы hәм тілі” деген пайымы өз маңызын әлі жойған жоқ деген сөз. Олай дейтініміз, елімізде атқарылып жатқан сан-салалы саяси, экономикалық реформалар, өміршең бастамалармен қатар шешімін табуы тиіс күрмеуі мол проблемалар, елең еткізетін жаңалықтар, жақсы тәжірибелер, мемлекеттік мәселелер, жеке адамның тағдыры, отбасындағы жанайқайға толы мұң мен келешекке жетелейтін үміт сәулесі – осының бәрін жеріне жеткізіп, иінін қандырып жазатын да, қалың жұртшылыққа жеткізетін де, түсіндіретін де бұқаралық ақпарат құралдары. Қашан да қоғамның алдында жүруді басты мақсат санайтын журналистер армиясын “қарусыз майдан жауынгеріне” теңеу көп жайтты аңғартып тұр. Көктемде топан су еліміздің бірқатар өңірлеріне жайылып, қиыншылық тудырғанда БАҚ-тың салмағы мен беделі анық білінді.
Облыс әкімі Ғауез Нұрмұхамбетов Бұқаралық ақпарат құралдары қызметкерлері күні мерекесі қарсаңында жергілікті журналистердің қатысуымен өткен жиында олардың еңбегіне “билік пен халық арасындағы алтын көпір” деген баға беріп, әркез қоғамдық өмірдің қайнаған ортасында жүретінін, мамандықтың қызығы мен қиындығы мол, зор жауапкершілікті талап ететінін атап көрсетті.
“Байланыс пен коммуникация құралдарының қарқынды дамуына қарамастан, сіздердің мамандығыңыз ерекше қызықты және күрделі болып қала береді. Бұрынғыдай оқырмандардың, тыңдаушылар мен көрермендердің сенімін ақтаған үздік дәстүрлер сақталып, жаңаша иірімдермен толығып келеді. Азаматтық ұстаным және әділдікке ұмтылу, халықтың мүдделеріне адалдық қасиеттеріңіз – құрметке әбден лайық.
Мемлекет басшысы атап өткендей, өз міндетін абыроймен атқару үшін әрбір журналист мақсатқа ұмтылу, ізденімпаздық пен жауапкершілік танытуы қажет. Кәсіби маман ешқашан шындықты бұрмаламайды. Басқаша айтқанда, медиа өріс әділеттілік аумағына айналуы керек. Өңір журналистерінің солтүстікқазақстандық тұрғындарды су тасқынына қарсы іс-шаралар туралы жан-жақты құлағдар етіп, әр жарияланымға жеделділік пен шынайылық бергенін айрықша атап өткім келеді”, – дей келіп, 26 ақпандағы кездесу барысында БАҚ өкілдері тарапынан айтылған ұсыныс-пікірлердің бақылауда ұсталынатынын, жалпы журналистерді ұлықтау кәсіби мерекемен шектелмейтінін, жыл сайын өткізілетін конкурстардың ережелері пысықталғаннан кейін арнайы қаражат бөлінетінін, “Қызылжар жастары” жеңілдікті ипотекалық кредиттеу бағдарламасына БАҚ қызметкерлерін қосу мәселесі ескерілетінін жеткізді.
Құттықтау рәсімінен кейін Ғауез Торсанұлы республикалық және облыстық басылымдар мен электронды ақпарат құралдарында жемісті еңбек етіп жүрген бір топ журналиске Құрмет грамоталары мен Алғыс хаттарын және ақшалай сыйақы тапсырды. Әріптесіміз, “Қызылжар-Ақпарат” жауапкершілігі шектеулі серіктестігінің бас редакторы Нұргүл Оқашеваға өңір басшысының Құрмет грамотасы табысталғанын зор сүйінішпен айта кеткен жөн.
Салтанатты шарада журналистика саласының ардагері, жазушы-публицист Жарасбай Сүлейменов, республикалық “Егемен Қазақстан” газетінің өңірдегі меншікті тілшісі Жақсыбай Самрат, “Қызылжар-Ақпарат” ЖШС-ның директоры Ербақыт Амантайұлы, тағы басқалары әріптестерін төл мерекемен құттықтап, жылы тілектерін арнады.
Өмір ЕСҚАЛИ,
“Soltustik Qazaqstan”.