Soltüstık Казахстан
Сауда және интеграция министрі Арман Шаққалиев Қызылжар өңіріне жұмыс сапарымен келіп, Солтүстік Қазақстан, Ақмола, Қостанай және Павлодар облыстарының бизнес өкілдерімен кездесті.
Ведомство басшысы ішкі нарықты сапасыз өнімдерден қорғау, отандық тауар өндірушілерді қолдау мемлекеттің басым бағыттарының бірі екенін, жеке кәсіп жүргізуге қолайлы жағдай жасалғанын, әкімдіктермен бірлесе сауда нысандарын жаңғырту жұмыстары жүргізіліп жатқанын атап өтті. Петропавл қаласында “Южный” және “Әмбебап сауда орталығы” базарлары жаңартылғанын мысалға келтірді. Биылдан бастап министрлік кәсіпкерлерге қайта қалпына келтіру жұмыстарын жүргізуге, сондай-ақ сауда объектілерінің инфрақұрылымын жетілдіруге жәрдемдесетін болады. Соңғы 5 жылда алғаш рет шағын және орта бизнес субъектілері мемлекеттік қолдауға ие болды.
“Жуырда республикалық бюджет комиссиясында сауда кәсіпорындарын жаңғырту үшін несиені арзандатуға биыл 4 млрд. теңге бөлу туралы шешім қабылданды. Қазір жобалар тізімі жасалып жатыр, екінші деңгейдегі банктермен бірлесіп, бағдарламаны жүзеге асыруға дайынбыз”, – деді Арман Абайұлы.
Сонымен қатар шекара маңындағы аумақтарды дамыту үшін өңірлерде ілеспе инфрақұрылымы бар 5 трансшекаралық хаб құрылады. Трансшекаралық хаб инвесторларды тарту орталықтарына айнала отырып, көрші елдерге шикізаттық емес экспортты 30 пайызға ұлғайтуға, Қазақстан арқылы өтетін транзиттік жүк ағынын екі есе арттыруға мүмкіндік береді. Қызылжар өңірінде А және В үлгідегі заманауи қоймалармен қоса 17 көтерме-тарату орталығын салу жоспарланған. Облыста елдегі ірі ауыл шаруашылығы өндірушілері шоғырланғанын, олар ішкі нарықты азық-түлікпен қамтамасыз етіп қана қоймай, экспортқа белсенді түрде өнім шығаратынын ескерсек, ауыл шаруашылығы өнімдерінің сақталуына елеулі көмек болары сөзсіз.
Отандық өнімнің бәсекеге қабілеттілігін арттыру және өндіріс жағдайларын біріздендіруде атқарылып жатқан елеулі шаралардың бірі – қазақстандық тауарлар реестерін қалыптастыру. Заң жобасы Парламент Мәжілісінің қарауына жіберілген.
Министрдің айтуынша, отандық тауарларды рәсімдеу айтарлықтай жеңілдетілмек. Бұдан былай “CT-KZ және индустриялық” сертификаттарын алудың қажеті жоқ. Барлық үрдіс орталықтандырылады. Қазақстандық тауарлар реестерінде тіркелген кәсіпкерлер мемлекеттік сатып алуға қатыса алады.
Бизнес өкілдерінің қатысуымен өткен жиында шетелден әкелінетін тауарлармен баға бойынша бәсекелесе алмайтын отандық тауар өндірушілердің проблемасы да қозғалды. Сапасыз импорттық тауарлар тарапынан демпингті болдырмау үшін министрлік жанынан арнайы штаб құрылған. Оның жұмысы саудадағы техникалық кедергілерді жоюға, қауіпсіз өнімді кіргізуге және айналымға түсуін қамтамасыз етуге бағытталған. Бүгінгі таңда мемлекеттік органдар 1163 бақылау үлгісін іріктеп алып, айналымнан мыңдаған сапасыз тауарлар алынып тасталды. Тамақ өнімдеріне сәйкестік туралы 121 декларацияның күші жойылып, Қазақстан аумағына әкелуге тыйым салынды.
Сауда және интеграция министрі Арман Шаққалиевтің қатысуымен өткен бизнес қауымдастықпен кездесу соңында Сауда комитеті мен республикалық сауда желілері одағы арасында ынтымақтастық туралы меморандум жасалды. Құжат ішкі сауданы дамытуға, қазақстандық тауар өндірушілерді қолдауға және бағаны тұрақтандыруға бағытталған. Меморандум шеңберінде тараптар ұйымдасқан сауданың үлесін 2027 жылға қарай 54 пайызға дейін ұлғайту жөнінде шаралар қабылдауға, сауда қызметін және бағаларды реттеу саласындағы заңнама талаптарының сақталуын бақылауға, отандық азық-түлік өнімдерінің сапасын арттыруға жәрдемдесуге келісті.
Министр жұмыс сапары аясында “Зенченко және К” командиттік серіктестіктің сүт зауытында, “Қазмясопродукт”, “Радуга”, “Зеленый Север” серіктестіктерінің көкөніс қоймаларында, “Aimer” супермаркетінде болды.
Өмір ЕСҚАЛИ,
“Soltüstık Qazaqstan”.