Идеологиялық жұмыстарға серпін керек

Облыстық ардагерлер кеңесінің кезекті пленумын ұйым төрағасы Ескендір Елеусізов қуанышты хабардан бастады. Ол жақында Астанада өткен ардагерлердің алқалы жиынынан облыс ардагерлерінің әлеуметтік маңызы бар тәжірибелік жобаларды іске асырудағы жетістіктері үшін берілген Алғыс хатпен оралған болатын. Бірлесе еңбек еткен әріптестеріне ризашылығын білдірген Ескендір Есмақұлы 2023 жылы атқарылған жұмыс нәтижелерін талдауға көшті.

Жұмыспен қамту және әлеу­меттік бағдарламалар басқар­ма­сының мәліметтеріне сүйен­сек, зейнеткерлердің саны өт­кен жылы 2022 жылмен салыс­тырғанда 855 адамға өсіп, 2024 жылдың басында 102 339 адам­ға жеткен. Ауыл халқының 57 па­йызын зейнеткерлер құрайды.

Бұл аудандық ардагерлер кеңестері мен ауылдық аймақ­тардағы бастауыш ұйымдарға ай­тарлықтай жауапкершілік жүктейді. Жалпы алғанда қазіргі қиындығы мол кезеңде баста­уыш ұйымдар зейнеткерлерді ортақ іске жұмылдырып, олар­дың әлеуметтік-тұрмыстық мә­селелерін шешуде белсенділік танытып отыр. Солай десек те, соңғы жылдары зейнетке шық­қан азаматтарды ардагерлер ұйымына тарту қарқыны бәсең­деп кеткені де жасырын емес. Мысалы, 2022 жылмен салыс­тырғанда былтыр бастауыш ардагерлер ұйымдарының есебіне алынбаған зейнеткерлер са­ны 2626 адамға өскен.

Бұл алаңдатарлық жағдай әсі­ресе, облыс орталығында, Айыртау, Мағжан Жұмабаев, Қы­зылжар, Уәлиханов, Ғабит Мүсірепов атындағы аудандар­да анық байқалады. Рас, мұның себебі ардагерлер ұйымдары басшыларының салғырттығын­да ғана емес, ауыл тұрғында­ры­ның қалаға көшуінің жиілеуіне де байланысты.

Ардагерлер ұйымдарының жұмысын ұйымдастыруда әлі де кемшіліктер мол болғанымен, оң өзгерістерді де байқа­мауға болмайды. Қаржылық және басқа да қиындықтарға қа­рамастан Тайынша, Шал ақын, Мағжан Жұмабаев, Мамлют, Жамбыл аудандарының арда­герлері түрлі мәдени, спорттық шараларды жүйелі өткізіп, сала­матты өмір салтын насихаттау­да үлгі көрсетуде. Шал ақын өңі­ріндегі Байқара сияқты өлкенің тарихи жерлеріне ұжымдық сая­хаттар, Торанғұл, Меңкесер көл­дері жағасында демалыс шара­ларын ұйымдастыруда арда­гер­лер ұйымдарының тәжірибе­лері мақтан етерлік.

Мәселен, Жамбыл аудандық ардагерлер кеңесінің төрайымы Нина Бородавконың ай­туынша, 38 еріктілер тобы бар. Зейнеткерлер “Даңқ жолы” және “Таза Қазақстан” акцияларына белсене қатысып жүр. Биылғы жы­лы қоғамның азаматтық са­на-сезіміне сынақ болған су тас­қынына қарсы күресте белсен­ділік танытқан облыстық арда­герлер кеңесінің “Күміс ерікті­лерінің” жетекшісі Сәуле Тахме­то­ва таяуда Ұлттық еріктілер же­лісі басшылығының Алғыс ха­ты­на ие болды.

Алайда бүгінгі күні аға ұр­пақ­ты жастарды идеологиялық тұрғыдан тәрбиелеудің қазіргі жай-күйі алаңдатып отыр. Арда­герлерді толғандыратын жайт­тарды Мамлют аудандық арда­герлер кеңе­сінің төрағасы Тө­леген Омаров айтты.

– Еліміздің, жастарымыздың болашағын ойлағанда үнсіз қа­ла алмаймын. Ашығын айта­йық, бізде идеоло­гиялық жұмыс әлсіз. Мемлекет басшысы Қа­сым-Жомарт Тоқаев үшінші ұлт­тық Құ­рылтай отырысында жас­тарды идеологиялық тәрбие­леуге ерек­­ше тоқталғанын біле­сіздер. Бұл, әсіресе шекаралас біздің өңір үшін өте маңызды. Ал біз­дегі жағдай қалай? Же­ңістің 80 жылдығына да аз уа­қыт қалды. Бірақ бұл маңызды күнге дайын­дықты ешкім үйлес­тіріп жатқан жоқ. Қызыләскерде ардагерлер өз бастамалары­мен қаза тапқан жауынгерлерге арналған ес­керт­кіштерді ретке келтірді. Ал Президент сөз еткен идеоло­гиялық жұмыстың алдыңғы ше­бінен көрінуі тиіс ішкі саясат бас­қармасының жұ­мысы байқал­майды. Мен идео­логиялық фо­рум өткізіп, келелі мәселелерді облыс әкімімен бірге талқылап, бағыт-бағда­рымызды айқындап алуды ұсына­мын, – деді Төлеген Омаров.

Ақсақалдың бұл сөзі көптің көкейінен шығып, қолдау білдір­ді. Облыстық ардагерлер кеңе­сінің төрағасы Ескендір Елеу­сізов те ішкі саясатқа көңілі тол­май­тынын білдірді. Осылайша аға буын идеологиялық жұмыс­тар­­дағы кемшіліктерді ашық айтты.

Адамның дәрежесіне, ман­сабына қарамай ортақ мүдде үшін шындықты тура айту – Мем­­­­лекет басшысының Әділет­ті Қа­зақстанды құру тұжырым­да­ма­сының сәтті жүзеге асуын қа­лай­тын әрбір ел азаматының адам­гершілік борышы. Ел бола­шағын ойлайтын, келеңсіз жай­ларға бейжай қарай алмайтын аға буын өкілдерінің пленумда ай­тылған ойлары осыған ойыс­ты.

Мемлекеттік саясатты жүзе­ге асырып, ауызбіршілікті сақ­тау және ұрпақты адамгерші­лікке, еңбекке тәрбиелеу идея­ларын жүзеге асыруда алдыңғы қатарда келе жатқан белсенді ардагерлер пленумда марапат­қа ие болды.

Ардагер ұстаз, Солтүстік Қа­зақстан облысының құрметті азаматы Нелли Иванова мен Есіл аудандық ардагерлер кеңе­сі төрағасының орынбасары Ва­лентина Редькина Орталық ар­дагерлер кеңесінің “Құрмет бел­гісі” төсбелгісімен марапат­талды.

Тимирязев ауданындағы Ти­мирязево ауылдық округі бас­тауыш ардагерлер ұйымының төрайымы Людмила Квасова, Мамлют аудандық ардагерлер кеңесінің мәдениет, спорт, отан­шылдық тәрбие комиссиясы­ның төрағасы, облыстық арда­гер­лер кеңесінің мүшесі, аудан­ның құрметті азаматы Болат Қор­қытов пен Уәлиханов аудан­дық ардагерлер кеңесінің төрайымы, ауданның құрметті аза­маты Ирина Пояркина Орталық ардагерлер кеңесінің Құрмет грамотасын алды.

Облыстық ардагерлер кеңе­сінің жастарды патриоттық және адамгершілікке тәрбиелеу жө­ніндегі тұрақты комиссиясының төрағасы Сәуле Тахметова Қа­зақстан Республикасы Білім ми­нистрлігінің “Еңбек ардагері” ве­домстволық медалімен мара­пат­­талды. Көп жылғы адал еңбегі үшін облыстық ардагерлер ке­­ңе­сінің жоғары наградасы – “Сол­түстік Қазақстан облы­сы­ның құр­метті ардагері” төсбел­гісі облыс­тық ардагерлер кеңе­сінің мү­шесі, “Ардагер” клубының төрайымы Нина Полещукқа бұйырды.

Марат ЕРМҰҚАНОВ,

облыстық ардагерлер кеңесінің баспасөз хатшысы.