Soltüstık Казахстан
Қызылжарлықтар қала күнін сән-салтанатымен атап өтті. Қаламыздың басты алаңында өңір тұрғындарының көзайымына айналған дәстүрлі халықаралық “QYZYLJAR – MUSIC FEST” фестивалі ұйымдастырылды. Тұрғындарды ерекше форматымен қызықтыратын фестиваль үшінші жыл қатарынан өткізіліп келеді. Мерекелік шараларға өңір басшысы Ғауез Нұрмұхамбетов қатысты.
Алдымен хореографиялық концерт көрермендерге жол тартты. “Туған жер”, “Қуанамын”, “Sensitive”, “Diamonds”, “Әдемі-ау”, “Мәңгілік”, “АССА Petropavlovsk” би ансамбльдерінің ғасырлар үнімен үндескен әсем әуеннің ырғағына тербетіле билеген билері көрермендердің көңілінен шықты.
– “QYZYLJAR – MUSIC FEST” фестивалінің өтуіне өңірдегі алты ұжым атсалысуда. Аталмыш іс-шара хореографиялық, классикалық деген екі бөлімнен тұрады. Астана, Мәскеу қалаларынан, сонымен қатар Аргентина, Италиядан келген өнерпаздар өнер көрсетті. Мұның бәрі қала тұрғындарына тамаша көңіл күй сыйлау мақсатында ұйымдастырылды, – деді облыстық мәдениет, тілдерді дамыту және архив ісі басқармасы басшысының міндетін атқарушы Санат Әубәкіров.
Қызылжардың ашық аспанын әнге бөлеген өнерпаздар тыңдарманның жүрегіне терең бойлады. Музыка атты сиқырлы әлемнің сұлулығы мен ұлылығын паш ететін фестивальдің класикалық бөліміне жиналған жұртшылықтың көптігі соншалық, бас алаңда ине шаншар орын болмады. Музыкалық кеште отандық және әлемдік музыка мәдениетінің алтын қорына айналған озық туындылар орындалды.
– Еркеғали Рахмадиев атындағы мемлекеттік академиялық филармония жанындағы симфониялық оркестрдің, Ақан сері атындағы облыстық филармонияның, шалқар шабыт иесі Денис Шаповаловтың көрсеткен өнерлері қатты ұнады. Мерекелік кештен тамаша әсер алдым, – дейді қала тұрғыны Қанат Жәулітбаев.
Облыс әкімі Ғауез Нұрмұхамбетов “QyzyljarArt center” орталығында өткен мерекелік іс-шараға барды. Мұнда меймандар назарына “Теріскей” фольклорлық ансамблі дайындаған концерттік бағдарлама көрсетілді. Өңір басшысы сәндік-қолданбалы өнер бұйымдары жәрмеңкесін, “Open air” әдеби қонақ бөлмесі мен Қазақстан Сәулетшілер одағының мүшесі Александр Листопадныйдың “Менің туған қалам” және қала тарихынан сыр шертетін “Ойшыл да нәзік менің өлкем” көрмелерін тамашалады.
“Open air” әдеби қонақ бөлмесінде И.Шухов атындағы орталық қалалық кітапхана “Сен туралы, менің сүйікті қалам” атты поэзия кешін өткізді. Кітапхана директоры Гүлназия Бикенова қала тарихы ақындардың жырларымен сабақтасатынын жеткізді.
– Жергілікті ақындар Қызылжарға арнаған өлеңдерін оқыды. Қаламгерлердің шығармашылығымен танысуды мақсат тұтқандардың қатарында есімдері өңірге белгілі еңбек ардагерлері болды. Шекарамыздың шебінде тұрған сүйікті қаламыз талай ақынның шығармасына арқау болған, – дейді Гүлназия Бикенова.
Бұл күні Сәбит Мұқанов атындағы облыстық қазақ сазды-драма театрында “Әнім де сен, жырым да сен – QYZYLJAR” деген атаумен галаконцерт өтті.
– Бәріміздің алтын бесігімізге айналған Қызылжар – құтты мекен. Қала күні құтты болсын! Қаламыздың дамуына сіздердің қосып отырған үлестеріңіз орасан. Бүгін Орталық алаңда, өзге де мәдениет ошақтарында рухани кештер ұйымдастырылуда. Жерлестеріміздің рухын асқақтату үшін мәдениет саласын дамыту маңызды. Сондықтан да руханиятқа көбірек көңіл бөлуіміз керек, – деді өңір басшысы Ғауез Нұрмұхамбетов.
Салтанатты сәт үстінде “Есіл өңірі – ән бесігі” атты “Үздік ауылдық мәдениет мекемесі – 2024” атты облыстық байқаудың жеңімпаздары да анықталды. “Шығармашылық ізденіс” аталымы Шал ақын ауданына бұйырса, Біржан сал атындағы арнайы жүлдені Жамбыл ауданы қанжығасына байлады. Жүлделі үшінші орынды Тайынша ауданы, екінші орынды Мамлют ауданы иеленді. Бірінші орын Ғабит Мүсірепов атындағы ауданға бұйырды. Ал Есіл аудандық Мәдениет үйі 2024 жылдың “Үздік ауылдық мәдениет мекемесі” деп танылып, ұжымға “Газель NEXT” автомобилінің кілті табысталды.
Қала күніне арналған мерекелік іс-шаралар “Сүйікті қалам” концерттік бағдарламасымен жалғасты. Өңір басшысы Ғауез Нұрмұхамбетов қала тұрғындарын құттықтап, жүрекжарды лебізін білдіріп, Михаил Трошихин, Анатолий Белоног және Азамат Мағзұмовқа “Солтүстік Қазақстан облысының құрметті азаматы” төсбелгісін табыстады. Александр Азегов, Қымбат Исманова, Рауза Кашенева “Петропавл қаласының құрметті азаматы” атанды.
Қала күніне арналған іс-шаралар легі “Солтүстік жұлдызы”, 3 емхана қасындағы (Мещан орманы) саябақтарда, “Бірлік”, “Береке” шағынаудандарында жалғасқанын айта кеткеніміз жөн.
Самрат ҚҰСКЕНОВ,
“Soltüstık Qazaqstan”.