Soltüstık Казахстан
Облыстық көпбейінді балалар ауруханасына жыл басынан бері жоғары қабаттың терезесінен құлап түскен алты бала жеткізілді. Дәрігерлер ауыр жарақат алған кішкентай сырқаттарды аман алып қалды.
Балалардың терезеден құлау фактілері көбеймесе азаяр емес. Облыстық көпбейінді балалар ауруханасының травматология және ортопедия бөлімінің меңгерушісі Асылхан Жағыпаровтың айтуынша, биыл жарты жылда өткен жылдың ұқсас кезеңімен салыстырғанда балалардың биіктен құлау жағдайлары 16,6 пайызға артқан. Сондықтан дәрігерлер амалсыздан бұл мәселеге ересектердің назарын аударуды жөн санапты.
Биыл көпқабатты үйдің терезесінен құлаған алты баланың екеуі – 5 жасқа дейінгі бүлдіршін. Қалған төртеуі – 10 мен 18 жас аралығындағы жасөспірімдер.
“Ересектеу балалар психикалық жағдайына байланысты немесе ойнап жүріп, абайсызда құлап кетеді. Мұндай жағдайға жол бермес үшін ата-ана балаларына мұқият болса екен дейміз. Қазір терезелерге арналған қорғаныш заттардың түрлері көп. Сондай-ақ терезе жанына жиһаз, орындық қоюға болмайды. Балаға терезе жақтауына шығудың қауіпті екендігін айтып, түсіндіру керек”, – дейді Асылхан Жағыпаров.
Дәрігердің айтуынша, ауруханаға түскен балалар бас жарақаты, мидың шайқалуы, омыртқаның сынуы, өкпенің жыртылуы, қанның ұюы, қолаяғының сынуы секілді жарақаттар алған. Мамандар ауыр халде түскен балалардың өмірі үшін күресіп, былтыр да, биыл да өлімге жол берген жоқ.
Ақерке ДӘУРЕНБЕКҚЫЗЫ,
“Soltüstık Qazaqstan”.