Soltüstık Казахстан
Бұған дейін ақпарат құралдарында облыс орталығындағы Солтүстік Қазақстан университеті колледжінің жабылатыны туралы айтылған болатын.
Бұл мәселеге орай студенттер мен олардың ата-аналары алаңдаушылық білдіріп, біраз әуре-сарсаңға түсті. Алайда әзірге оқу орны жабылмайтын болды. Бұл туралы облыстық білім басқармасының басшысы Айнагүл Сұрағанова мәлімдеді.
Оның айтуынша, облыстық білім басқармасы мен колледж құрылтайшысы тарапынан екі жақты келіссөздер жүргізіліп, оқу ордасын жаппау туралы ұйғарым шығарылды.
– Бүгіндері колледжде 6 мамандық бойынша 310 студент білім алуда. Олардың 80 пайызы, яғни 246 бала – грант иегерлері. Биыл колледж студенттерге білім беру үрдісін тоқтатпайды. Студенттер тиісті мамандықтар бойынша оқуды жалғастырады. Келесі жылы аталмыш оқу орны жабылса, білім алушылар өзге колледждерде оқуларын жалғастыратын болады. Гранттары сақталады, – деді Айнагүл Сұрағанова.
Жалпы біздің өңірде бүгінде 24 колледж бар. Олардың 19-ы – мемлекеттік болса, қалғаны – жекеменшік. Онда 10 мыңнан астам студент білім алуда. Орта арнаулы білім беру мекемелерінің тең жартысы облыс орталығында орналасқан.
Ақмарал ҚҰРМАНАЙҚЫЗЫ,
“Soltüstık Qazaqstan”.