Soltüstık Казахстан
Облыс әкімі Ғауез Нұрмұхамбетов жұмыс сапарымен Мамлют ауданында болып, кәсіпорындардың, жылқы фермасының жұмысымен танысып, шаруалармен кездесті. Сонымен қатар өңір басшысы Мамлютка қаласындағы қазандықты барып көрді. 2016 жылы салынған қазандыққа 3 әкімшілік нысан мен 2 көпқабатты тұрғын үй қосылған.
Облыс әкімі “Agrimer Mamlutka” ЖШС-ның жұмысымен де танысты. Серіктестік 1994 жылдан бері ауыл шаруашылығы саласында жұмыс істеп келеді. Бидайды өңдеп, ұн үгумен айналысады. Қазіргі таңда шаруашылық 150-ге жуық адамды жұмыспен қамтып отыр.
Одан кейін Ғауез Нұрмұхамбетов республикалық Челябі – Новосібір тасжолын жөндеу жұмыстарымен танысты. Аталған жолды қалпына келтіруге 9,9 млрд. теңге қаражат бөлінген. “Казавтожол” АҚ облыстық филиалы директорының міндетін атқарушы Талғат Смағұловтың айтуынша, бұл учаскеде Астана қаласының “КазСтройТехник” компаниясы жұмыс істеп жатыр. Жоба 2023-2024 жылдарға жоспарланған.
Дубровное ауылындағы әлеуметтік нысандар жаңартылуда. Мектеп пен фельдшерлік-акушерлік пунктке күрделі жөндеу жүргізілуде. Мәдени-демалыс орталығында да жөндеу басталып кетті.
Аудандағы үлгілі шаруашылықтардың бірі – “Белое-Агро” жауапкершілігі шектеулі серіктестігі Щучье ауылында жұмысшыларына жаңа үйлер салып жатыр. Бұл мақсатқа 100 млн. теңге қаражат бөлінген.
Сонымен қатар серіктестік басшысы бұрынғы мектеп ғимаратын жөндеп, демалыс орталығын ашуды көздеп отыр. Жоба құны 80 млн.теңге. Орталықта демалыс орны, асхана, дүкен, кітапхана және спорт нысаны болады деп жоспарланған.
Облыс әкімі Белое ауылында орналасқан “Кулик” ЖШС-да да болды. Серіктестік 2001 жылы құрылған. Қазіргі таңда егістік аумағы 9842 гектарды құрайды. Сонымен қатар 676 бас ірі қара өсірумен айналысады.
Ал Бексейіт пен Бостандық ауылдарында биыл жаңа медициналық пункт ашылады. Новомихайловка мен Покровкада фельдшерлік-акушерлік пункт салынуда. Мамлютка, Дубровное, Воскресеновка, Краснознаменное, Бексейіт және Михайловкаға су тарату желілері тартылып, Афонькино ауылында су қондырғысы салынуда.
Мәдениет үйінде өңір басшысы Мамлют ауданының тұрғындарымен кездесу өткізді. Өзекті мәселелерді талқылап, ауданды дамыту міндеттерін белгіледі. Тұрғындар инфрақұрылымды жақсарту бойынша ұсыныстарын ортаға салып, сұрақтарын қойды, облыс әкімі ауданда атқарылып жатқан жұмыстарға тоқталды.
Мамлютка қаласында жаңа дене шынықтыру-сауықтыру кешенінің құрылысы жүріп жатыр. Аталған нысанның құрылысына 872,2 млн. теңге бөлінген. Кешенді келесі жылы тапсыру жоспарланған. Сондай-ақ аудан орталығында жиһаз индустриясы үшін ДСП шығаратын зауыт іске қосылады.
Аманжол НҰРТАЗИН,
“Soltüstık Qazaqstan”.