Soltüstık Казахстан
Облыс әкімі Ғауез Нұрмұхамбетов су тасқынынан зардап шеккен Қызылжар ауданындағы Большая Малышка ауылында болды. Бұл ауылда 321 үйді су басқан, оның 66-сы тұруға жарамсыз. Қазірдің өзінде 19 үй сүрілген. Апатты үйлерді бұзу және үйлерді жөндеу жалғасуда. Құрылыс жұмыстарын мехбригадалар жүргізуде, ауыл тұрғындары өз күштерімен де үйлерін қалпына келтіріп жатыр. Өңір басшысы тұрғындармен сөйлесіп, атқарылып жатқан жұмыстардың сапасын тексерді.
Надежда Крутскихтің баспанасын Тайынша ауданынан келген мехбригада қалпына келтіріп жатыр. Сметалық құжат бойынша баспананы қалпына келтіруге 5 млн. 800 мың теңге бөлінген. Бұл үйді жөндеуді механикалық бригада 25-ші мамырда бастаған. Олар Большая Малышка ауылындағы 24 үйге жауапты.
Сонымен қатар Большая Малышка ауылында әлеуметтік инфрақұрылым қалпына келтірілуде. Ауыл мектебіне күрделі жөндеу жұмыстары жүргізіліп жатыр. Облыс әкімі жаңа оқу жылы басталғанға дейін барлық жұмыстарды аяқтауды тапсырды.
Аталған елді мекен “Ауылдық денсаулық сақтауды жаңғырту” ұлттық жобасына енгізілген. Мұнда медициналық қызмет көрсету сапасын арттыруға мүмкіндік беретін жаңа фельдшерлік-акушерлік пункт салынып жатыр. Жоба құны – 203,3 млн. теңге. Құрылыс мамыр айында басталған. Бас мердігер – “Севимсталькон” ЖШС.
– 20-шы мамыр күні келісімшартқа қол қойдық. Бірақ құрылысқа бір айдан кейін кірістік. Себебі ауылдың ішінде су тұрды. Құрылыс жүретін орын дайындап, ағаштарды кестік. Жерді қазған кезде ескі балабақшаның іргетасы шықты. Барлығын алып тастадық. Қазір іргетасын көтеріп жатырмыз, – деді “Севимсталькон” ЖШС-ның директоры Сұлтанбек Газдиев.
Осы күні облыс әкімі “Серебряный бор” жазғы сауықтыру лагерінде де болды. Бұл мекемені де көктемде су басқан еді. Бүгінде күрделі жөндеу аяқталды, лагерь балаларды қабылдауға дайын. Жаздың соңына дейін 200 оқушыны қамтитын екі маусым өткізу жоспарланып отыр. “Серебряный бор” жазғы сауықтыру лагерінің директоры Ғафура Бөстекованың айтуынша, лагерьде асхана, ойын алаңдары бар, душ орнатылған. Ауызсу мәселесі де шешілді.
Аманжол НҰРТАЗИН,
“Soltüstık Qazaqstan”.